Imphal, Jylliew 27 : Haduh 1300 ngut ki Longkmie jong ka Jaidbynriew Meitei kiba dei na ki seng bapher bapher,ha ka sngi Balang, kila pynlong ia ka rally kaba heh bha ban dawa ia ka jingwanrah da ki bor pahara ka Jylla ha ki Shnong Meitei kiba hap hapoh ka Jiribam District ka Manipur.
Kane ka rally kala sdang na Iew Jiri Ima bad la pynkut ha Ophis u Deputy Commissioner ka Jiribam District da ka jingaiti ia ka dorkhas sha u Deputy Commissioner.
Ia kane ka rally la pynlong da ka Leeching, Jiri, All Jiribam United Clubs Association (AJUCA), Jiribam Development Organization (JDO), World Meetei Council (WMC), Jiribam unit, Apunba Jiri Meira Paibi (AJMP), Jiri Women Association of Kangleipak (JIMWAK), Women Association for Socio-Economic Development (WASED), Jiri Ima Meira Paibi Apunba Lup (JIMPAL), Women Welfare Organization of Kangleipak (WWOK) bad ka Leeching Women wing.
Ki jingkynnoh kila mih na ki trai shnong ba ki bor pahara ka Sorkar Pdeng khamtam ki shipai Assam Rifles kim shym la ai jingiada ia ki paid Meitei kiba dei ki trai shnong hynrei kila bthah pynban ia ki nongshongshnong ba kin mih nala ki jong ki Iing ki sem.
Ha ka dorkhas, kine ki seng kila pynpaw ba ka jingdon jong ki bor pahara ka Jylla bala buh ha Borobekra Sub Division ka long kaba dang tlot palat bad kine ki bor pahara kim lah satia ban iada ia ki nongshongshnong na ka jingwan hiar thma jong ki kynhun kaikhlaw.
Kila dawa ruh ban ai jingiarap mar mar ia baroh ki briew bala kylla phetwir kiba la sah ha ki relief camp bapher bapher ha Jiribam bad ruh ban iarap pynshna biang ia ka iing jongki, kiba la shah wiang ding.
Kine ki Seng Longkmie kila dawa ban wanrah biang ia ka jingsuk ha Jiribam bad ban pynsangeh mardor ia ka policy ban pyniapait iapra bad ban synshar.
Ha ka 11 tarik Jylliew, ha ka dorkhas bala phah sha u Myntri Rangbah ka Manipur N Biren Singh, ka Meira Paibis bad ka Club of Chandrapur Ward number 7 bad 8, ka Jiribam kila kynnoh ba ki shipai Assam Rifles kim shym la lah ban iada ia ka bha ka miat jong ki paid Meitei ha Jiribam.
