Shillong, Jylliew 09: Ki Sengbhalang ka jylla hynne ka sngi Nyngkong kila dawa na ki bahaiing bahasem jong ki shi kurim kiba na Indore bad na ki lad pathai khubor National Media ba ki dei ban pan map khlem kano kano ka jingbuh kyndon halor ka jingkynnoh bad pynbudnam sniew ia ki tnad treikam ka Meghalaya ba kim larkam ha ka rukom tyreikam bad ban jur ia ka jingdonkam ban pyntreikam noh mardor ia ka Inner Line Permit (ILP) ha ka jylla.
“(Ngi) dawa ba kidei ba ki National Media Channels kidei ban pan map paidbah halor ka jingpyni ia ki khubor kiba don tang shiteng ka jingshisha bad na u Vipul Raghuvanshi u hynmen jong uba la khlad noh uba la kynthoh pyrshah ia ki tnad treikam ka Meghalaya ba kim larkam, kaba la lam ruh sha ka jingjia kaba sngewsih ia u Raja Raghuvanshi bad ka jingjah klep bad ka jingmih biang jong ka Sonam Raghuvanshi. Ngi dawa ruh ia ka jingpan map na u Vipul Raghuvanshi bad Devi Singh u kpa jongka Sonam Raghuvanshi, uba la iai bteng ban khein troin bad pynthobria hakhmat jong ki paidbah ia ki tnad treikam ki jong ngi bad sdang ruh ban kynnoh sniew ia ngi baroh ki nongshong shnong jong ka jylla bad khamtam eh ia ka jaidbynriew ka jong ngi” la pynpaw ka Hynniewtrep Youth Council (HYC) ha ka kyrwoh khubor.
Ka Confederation of Meghalaya Social Organizations (CoMSO) kala ong ba ka iengskhem ia ka jingdionkam kyrkieh ban pyntreikam noh ia ka Inner Line Permit (ILP) ha Meghalaya.
“Lada dei ba la pyntreikam ia ka ILP, ka iaid ka ieng jong ki briew kiba nabar kan dei kaba la shah buh ha ki jingthoh ha ki kot ki sla, shah pyrkhing bad la buh rekod. Kan don ruh ka atiar kaban buh ia baroh kiba wan rung ban don ia ka jingkitkhlieh ha kaba iadei bad ka ain ka kanun, khamtam ia kito baroh kiba wan kum ki nongjngohkai hynrei kiba don pat ia ka jingmut kaba sinew ne ban pynmih ia ka jingbym shngain” kala ong bad ka bynrap “Ka ILP ka pynthikna b akum kitei ki khana kin dei kiba la shimkhia da ka jingshai jong ka lynti ka ain ym da ka jingmutdur kaba klumar. Ka ai ruh ia u lain jong ka jingiada ia ka jingshah pynthohbria jong ka kolshor bad kaj ingshimkabu ia ka jingleh bha. Ka jingdon ia ki jingdkoh ha ka State Guest Registration bad Tourist Monitoring System kim dei tang ki jingpeit jngai jong ki bor synshar, kidei ki jingduna kiba ailad ia ka jaidbynriew ban ym shah burom, ban sngewthuh bakla bad ban kylla long kum ki langknia ha ki por ba mih ki jingeh”.
Ka CoMSO kala kyntu ruh ia u Myntri Rangbah ka jylla u Conrad K. Sangma, ban leh da kaba tyngeh katkum ka ain hapoh jong ka Criminal bad Civil Laws pyrshah ia kito kiba pynthohbria ia ka jylla, kiba pynsaphriang ia ka jingiapher jaidbynriew bad pynthud ia ka kam tohkit da ki bor khmih.
“Ka jylla kam dei ban ailad ia kane ka jingshah pynthohbria khlem da iakhun pyrshah. Dei ban thaw ia ka nuksa ban pynthikna ba yn ym don uno uno u riewshimet lada dei uba paw katno katno ruh, yn pynlong ia ka Meghalaya kum ka jaka ban leh pyrshah jong ki lad pathai khubor khlem kano kano ka jingkitkhlieh”.
Nalor kane ka CoMSO kala kyrpad ruh ia ka sorkar India ban ai iaka jingpynshai hapoh Parliament ne lyngba ka Ministry of Home Affairs ban pynskhem ia ka jingtbit jong ka Meghalaya Police, ka jingjop jong ka jingtohkit bad ia ka kamram jong ki trai shnong bad ka NDRF ha kaban lap ia ka jingshisha halor katei ka jingjia.
 ha ka jylla.){kind=link}