Shillong, Nohprah 18: Hadien ka jingioh jingtip ba u Sordar ka Sohryngkham Bah Donbor Kharmujai ula ai dulir sha kawei ka longïing ba ioh lok bar jylla, hynne ka sngi ka Federation of Khasi Jaintia and Garo People (FKJGP) kala dawa na u Sordar ban khot da ka dorbar ba kyrkieh.
Ia kane ka jingdawa khot Dorbar kyrkieh, ka FKJGP, kala dawa ban ioh jingpynshai na u Sordar Bah Donbor halor ka jingailad ban thied jaka ia kawei ka longkmie ka ba ioh lok da u bar jylla.
Haba kren sha ki lad pathai khubor u President ka FKJGP Sohryngkham Circle u Bah Wanlambok Kharmalki u la ong ba ka seng kam lah ban pdiang ia ki longkmie Khasi ki ba ioh lok da u bar jylla ba kin ioh ban thied ia ka jaka ka puta ha Sohryngkham.
U Bah Wanlambok ula iathuh ba naka liang ka seng kala dep ban ujor sha u Syiem ka Hima Khyriem u Paiem Balajied Sing Syiem bad sha u CEM ka KHADC bad kumjuh sha ki bor ba dei peit ban ujor halor ka jingleh mon u ne u Sordar hynrei haduh mynta, ka seng kam pat ioh iaka jingjubab.
“Ngi dawa ia u Sordar ba udei ban khot da ka Dorbar kyrkieh bad udei ban pynshai, halor kano ka nongrim, ka briew ba ioh lok bar jylla ka jingioh thied ha Sohryngkham khlem da pyntip ia ka executive committee (EC) jong ka shnong” la ong u Bah Wanlambok.
Naka liang u general secretary ka FKJGP u Bah Rocky Kharduit ula ong ba kane ka jingle donbor u Sordar ka long ba u la iaid lait ia ki kyndon ka Shnong ka ba la pynmih ha ka 3 tarik u Naitung 2002 ka ba la mana pyrshah ban khanglad ia kano kano ka briew ka ba ioh lok bar jylla ba kan ioh ban thied jaka hapoh ka shnong.
