Shillong Nohprah 01: Ka United Hynniewtrep Movement (UHM) hynne ka sngi ka iakynduh ia u Symbud Myntri Rangbah ka jylla u Bah Prestone Tynsong bad dawa na ka sorkar jylla ba kadei ban pynkiew iaka jingai jingiarap sha ki longiing kiba la duh ia u khliehduh nongpyndap pynbiang jong ka iing haka jingshah siat iap ha ki pulit Assam ha ka 22 tarik u Naiwieng.
U President ka UHM u Bah Charlie Rani haba iakren bad ki nongthoh khubor ula ong ba ki longing longsem kila duh noh iaki 5 ngut ki nongkamai bad ki nongpyndap pynbiang iaka iing ka sem bad kitei ki longing kila shem jingeh bad ka lawei ka jongki ka don ha ka jingma kabakhraw namar ka jingbym donshuh ia u nongpyndap pynbiang iaka iing.
“Ngi dawa naka sorkar ba ka sorkar kam dei ban ai tang T.5 Lak hynrei kadei ban pynkiew noh ia kane ka jingai jingiarap pisa namar ba kam pat long kaba dap ba biang bad wat ia ka pisa kaba la mang ban pynlong iaka Cherry Blossom Festival dei ban ai noh sha kitei ki longing kiba laduh iala ki nongpyndap pynbiang” ong u Bah Rani.
Nalor kane ula dawa ruh baka sorkar kadei ban aikam aijam ruh ia iwei i dkhot na kitei ki longing kiba la mad iakaj ingjia ba sngewsih khnang ba kinlahbankyrshan iala ka iing ka sem ha ki snem kiban dang wan.
Ula ong ka UHM kala dawa ruh na ka sorkar jylla ba kadei ban kem bad ban wanrah sha Meghalaya ia ki pulit Assam kiba donkti ha kaban siat ia ki 5 ngut ki rangbah Khasi bad dei ban tian bishar iaki bad ban pynshitom ia ki katkum ki kyndon aiñ kiba tyngeh.
“Ha ka jingialang ngi la dawa ruh na ka sorkar ba kam dei ban buh iaka Border Out-post ha Barato hynrei kadei ban buh beit ha Mukroh bad dei ruh ban buh ia ki Outpost ha kylleng ki thain Khappud ban ai jingiada bad jingshngain ia ki paidbah ka jylla” ong u Bah Rani.
