Shillong, Naiwieng 12 : U Nongialam ka UDP bad Symbud Myntri Rangbah barim ka Jylla Bah Bindo M Lanong hynne ka sngi saitjain, ula dawa ia ka Sorkar Jylla ba kan pyntreikam ia ka Mines and Minerals Policy 2012.
“Ha u 2012, ka Sorkar kala pdiang ia ka Mining Policy. Ka dei ban pyntreikam bad ban iaid kat kum ka policy” ong u Bah Bindo uba long u MDC ba shu siej jong ka KHADC, haba iakren bad ki nongthoh khubor.
“Jin ba ka Sorkar ka pyntreikam ia ka Policy, ia mynta kiei kiei baroh kin kham biang” ula ong haba kdew ia ka jingktah jong ka hukum khang tih dewiong thliew khnai jong ka NGT ha u snem 2014 hapoh ka Jylla.
U Bah Bindo mynba u dang bat ia ka shuki Symbud Myntri Rangbah ba khmih ia ka Tnad Mining & Geology ha ka sorkar MUA-II jong ka Congress, ia ka Mines and Mineral Policy la dep ban pynkhreh bad la phah sha ka kynhun Myntri. Ha une ujuh u snem, ia kane ka policy la wanrah ha ka Dorbar Tlang jong ka Iingdorbar Thaw Ain ka Jylla.
Dang shen, u MP Rajya Sabha ba marwei ka Jylla Dr WR Kharlukhi ula ban jur ba ka Sorkar Pdeng bad ka Sorkar Jylla ki dei ban shah noh ia ka jingtih dewiong thliew khnai ba kan bteng lada kim lah ban pynsdang ia ka jingtih dewiong da ka jingstad saian ha ka Jylla.
Kat kum ka jingong jong u, ki paidbah kila sohsat shaba palat namar ka jingkhang ka NGT ia ka jingtih dewiong ha ka Jylla.
“Ngan sa rah iakren ia kane ka kam sha Parliament ba lada phim (Sorkar) lah ban leh (scientific minng), shah ia ki ba kin bteng ia ka jingtih dewiong thliew khnai. Lem kumta balei ba ki briew jong nga kin sohsat tang namar ka jingbym lah ban wanrah ia ka policy” ong u Dr Kharlukhi.
Haba twad jingmut halor kane, u Bah Bindo ula ong ba ka dei ban don da u pud ban shah ia ka jingtih dewiong thliew khnai hynrei ka jingtih dewiong da ka jingstad saian ka long kaba donkam bha.
“Haba iaid kat kum ka jinglong jingman ki jaka hapoh ka Jylla, ia ka rukom long ka Jylla, ka jingtih dewiong thliew khnai ka dei kaba la don naduh ka sngi ba nyngkong. Kam don satia kano kano ka jingma bad namar kata ha ki khep ki khep, ha ki katto katne ki jaka ia kane ruh lah ban pynman kum ka jingtih dewiong da ka jingstad saian. Phim lah ban ianujor ia kine ki par bad kito ki par ha Orissa ne Bengal. Namar kata, kaei kaba treikam shathie ka lah ban nym iahap satia ban treikam lang hangne” ong u Bah Bindi.
Ha kajuh ka por, une u Symbud Myntri Rangbah ka Jylla ula ong ba ka Sorkar Jylla ka dei ban pynsangeh noh ia ka jingtih beain ia u dewiong bad kumjuh ruh ia ka jingkhaii be-ain.
“Watla phi la iaid da ka jingstad saian, ka jingle tuh kan dang iai bteng beit namar ki nongleh tuh hi ki tip ia ka lynti. Phi mut ban ong ba lada phi wanrah ia ka jingtih dewiong da ka jingstad saian ba ka jinglehtuh kan sangeh?. Ki tip ia ka lynti. Namar kata, dei ban khang ia ka jingkhaii tuh. Ym dei ban ailad ia ka jingtih beain ne khaii beain ia u dewiong” ula ong.
Haba kyntu ia ki paidbah ban ujor pyrshah ia kum kine ki kam beain, u Bah Bindo ula ong “Ngi don ia ki Iingkasahri kaba ngi lah ban leit pynsngew ia ki jingeh jong ngi bad ka Iingkashari kan sa leh ia kaba donkam. Kaei kaba phi leh leh kat kum ka ain. Ka jingtih bad jingkhaii baroh ki hap hapoh ka ain”.
