Shillong, Nailur 13: Ka Sur ki Nong Mawlai hynne ka sngi ba-ar, kala dawa ia ka sorkar jylla ba kadei ban pynshitom mardor ia ki pulit kiba donkti ha kaban shim iaka jingim jong u Bah Cheristerfield Thangkhiew khamtam haba ka kaiphod jingtohkit kala pynpaw ba ki pulit kila pyndonkam palat pud iaka bor ka jong ki haka jingleit khynra iaka iingsah une u Nongialam barim ka HNLC.
“Ngi ki Lai Seng katta ka FKJGP, KSU bad HNYF, ngi dawa naka sorkar ba kadei ban pynshitom ia ki pulit kiba donkti ha ka ban siat bad shim iaka jingim u Bah Cheristerfield. Ngi dap ruh iaka jinglyngoh ba u Myntri Rangbah un khot ban pan jingpynshai na ka Tactical Team I kaba leit ban pynlong iaka jingkhynra, namar ka paw ba ka long tang ka jingpynleh noh ei iaka pisa u paidbah da ki phew lak ha ka jingthung iaka Commission of Enqiry kaba khlieh da u Justice T Vaiphei” ong u President ka FKJGP Mawlai Circle u Bah Khrawkupar Nongsiej haba iakren bad ki nongthoh khubor.
Kat kum ka jingong jong u, kane ka kaiphod kam dei kaba la rai pynrem hynrei kala pynpaw shai pat ba ki pulit kila leh bakla ha kaban shim iaka jingim briew. Kumta ka sorkar kadei ban pynshitom ia kiba donkti katkum ki kyndon aiñ.
“U Justice T Vaiphei haka kaiphod jingtohkit u la kdew shai ba ki pulit kila pyndonkam da ka bor ha kaban leit khynra iaka iingsah u Bah Cheris bad la kdew ruh ba ki pulit kila bakla ha ka jingleit kem ia u Bah Cheris. Hashwa ban leit khynra, ki heh pulit kila dep kren bad ai jingbatai ia ki pulit, ba kidei ban leit kem im ia u Bah Cheris ym ban shim iaka jingim briew”
U la ong, ki pulit kiba leit khynra kim shym la rah ia ki tiar kum ka Taslait bad pyndonkam ruh da ka Tear Gas khnang ba ki don hapoh ïing kin ioh mih noh shabar bad ban kem ia ki, ka jingleh ki pulit kala long palat kila shim noh iaka jingim jong u Bah Cheristerfield.
Katba u Nongialam ka KSU Mawlai Circle u samla Rapbor Nongrum u la ong, ka jingshim iaka jingim jong u Bah Cheris kadei tang ka jingleh khawpud jong ka sorkar bad ki pulit bad la dei ban kem im ia u ban pynshisha halor ki jingkynnoh ba u donkti ha ki kam be-aiñ.
“Ka jingkhot ban pan jingpynshai na kiba leit khynra, kadei tang ka buit ban tap eitmiaw bad kan eh aiu iaki ba kin khot ia u Bah Cheris ban ai jingpynshai khamtam haba u dei u briew uba ju iatreilang bad ki pulit haba ki donkam ia u ha kano kano ka por” ong u Samla Rapbor.
“Haba ka kaiphod jingtohkit kala pynpaw shai ba ki pulit kila leh bakla ha kaban shim iaka jingim u Bah Cheris, kumta ka sorkar kala dei ban suspon ia kitei ki pulit, kumba kala suspon bad wengkam ia ki pulit halor ka jinglait phet ki koidi na Phatok” la pynkut u nongialam ka KSU Mawlai.
