Shillong, Naiwieng 27 : Ka Dorbar Shnong ka Mukroh, West Jaintia Hills kala dawa ia ka Sorkar Jylla ban weng noh mardor ia ka Forest Beat House jong ka Assam kaba don ha Mukroh bad ban wanrah ia ka Police Outpost ban ai ka jingiada ia ki nongshongshnong kiba sah ha ki shnong khappud bad ka Assam.
“Ngi dawa ia u Myntri Rangbah ka Jylla Conrad K Sangma bad ka Sorkar jong u ba kin pynsted noh ha kaban buh ia ka Police Outpost ha shnong Mukroh lem kumta ngi la thikna ba ngin nym im hapdeng ka jingsuk” ong u Waheh Chnong ka Mukroh Bah Hamboide Sumar haba iakren bad ki nongthoh khubor hynnin ka miet.
“Ha kajuh ka por, Ngi dawa ruh ia ka Sorkar Jylla ban weng noh mardor ia ka Forest Beat House ka Assam na Mukroh namar ka dei kane ka daw bah kaba wanrah ia ki jingeh ia ki paidbah ha ki jaka khappud” ula bynrap.
U Bah Hamboi ula ong ba ka Dorbar Shnong Mukroh kala rai ban kyntait ia ka rai jong ka Sorkar Assam ban ai song jingiarap sha ki longiing jong ki 5 ngut ki nongshongshnong kiba iap naka jingther kuli ki Pulit Assam myn ha ka 22 tarik u Naiwieng.
“Ngi pyrshah jur ia kane ka rai jong ka Sorkar Assam bad da lei lei ruh ngin ym pdiang ia kane ka jingtyrwa song jingiarap” ula bynrap.
Une u Nongialam Shnong ula ong ba ka Dorbar Shnong ka pynpaw ia ka jingpyrshah kaba jur ia ka sienjam jong ka Sorkar Assam ban pynieng ia u mawmot jong u Forest Guard , uba la iap ha kane ka jingther kuli ha Mukroh.
“Ngi bad ka Iing ka sem jong ki lanot kiba iap bad kiba mynsaw na ka jingther kuli, ngi dawa ia u Myntri Rangbah ka Jylla bad ka Sorkar Jylla ban leh da kaba tyngeh ia ki Pulit Assam bad ki Forest Guard kiba donkti ha ka jingther kuli” ong u Bah Hamboi.
Ula ong ruh ba kam don satia ka jingshishah ha ka jingkynnoh jong ki Pulit Assam bad Forest Guard ba ki paidbah kila rah ia ki tiar pynmynsaw ha ka 22 tarik u Naiwieng.
“Ki briew jong ngi kim shym la rah tiar pynmynsaw ha kane ka sngi hynrei ki Pulit ka Assam kila pyniap iala u jong u briew ha kane ka jingther kuli” ula ong.
U Bah Hamboi ula ong ba ka Shnong Mukroh ka dei kaba dang hap ha Meghalaya, West Jaintia Hills bad kam hap satia ha ka jaka iakajia pud jong ka Block-I kumba kam da ka Assam.
“Ngi don ia baroh ki kot ki sla ban pynshisha ia ki jingkam jong ngi ba ka Mukroh ka dei jong ka Meghalaya bad ka dang hap hapoh u pud u sam ka Jaintia Hills Autonomous District Council (JHADC),” ula ong.
Ula bynrap “Ka Mukroh ka dang hap hapoh ka Nartiang Police Station ym kumba kam ki Pulit Assam ba ka hap hapoh ka Jirikinding police station.”
Haba pynkynmaw ia kane ka jingjia ba sngewsih, u Bah Hamboi ula ong ba ki paidbah kila iamih ban dawa pyllait ia ki lai ngut ki nongrep bala kem da ki Pulit Assam bad ki Forest Guard ha ka 22 tarik Naiwieng. Hynrei, khlem kano kano ka jingmaham, ki Pulit Assam bad Forest Giard kila ther kuli sha ki paidbah bad 6 ngut kila iap.
Ula ong ruh ba kane kam dei satia ka sien ba nyngkong ba ki paid Khasi kila shah pyniap ha ki Pulit Assam bad ka daw hi ka dei namar ka jingbym lah jong ka Sorkar Meghalaya ban shimkhia ia kiei kiei baroh dakaba pynslem ruh ban buh ia ka Police Outpost ha khappud.
