Palat lai kynta da ka kjat hap ïaid ban poi jaka sumar
Nongstoiñ, Nailar 7: Ki paidbah nongshong shnong kiba dodn ha ka Rambrai Constituency, kyrpang eh na ki lai tylli ki shnong kiba don ha ka thaiñ Rimen, ba kynthup iaka Marshiang, ka Umïong bad Mawdong, ki la dawa ba u MLA kumjuh ruh u MDC, ki dei ban thaw ki lad ki lynti katba lah ban pynioh surok noh ha ka thain.
Kila dawa ruh ba kine ki nongmihkhmat ki dei ban kyrshan lem na ka bynta ki paidbah, namar ki lai shnong ki dei kiba don ha kyndong eh jong ka Rambrai Jyrngam Constituency bad kiba jngai bha.
Haduh mynta don tang kawei ka surok kaba poi haduh Mawdoh, Synia bad Nongthymmai. Sngew synei na ka bynta ki nongshong shnong na kitei ki lai tylli ki shnong, namar haba ki leit donkam ha Rambrai lane Nongstoiñ bad kiwei kiwei ki jaka, ki hap ban ïaid da ka kjat kumba lai haduh saw kynta haduh ban da poi ha ka jaka ba katei ka surok ka don.
Ki kynthei bad longkmie ki la pynpaw ba ka jingbym don ïa ka surok, ka la buh ïa ki paidbah ha ka jingeh kaba khraw, khamtam eh ïa ki longkmie ba armet lada ki thmu ban leit phah sumar. Nangta haba don ki khunlung ne kynthei bad wat ki rangbah ruh haba jia ka pang ba shitom kiba la hap ban kit sha ki Hospital.
Ha kaba ïadei bad katei ka jingeh, bun ki riew rangbah kila sngewkhia jur halor ka jingiehnoh khunswet jong ka sorkar ïa kitei ki shnong. Ki da ong ba imat ka sorkar ka ñiew ba ki paidbah jong kitei shnong kim dei ki briew, hynrei ki dei tang ki shrieh ki tngaw lymda kumta balei kan shu iehnoh beiñ haduh katto.
Lah ban pynkynmaw ba ki la don ki seng kum ka FKJGP na ka thaiñ, kiba la lap bunsien ba ïa kiba pang ba shitom kiba thmu ban leit phah sumar ha Rambrai PHC, la hap ban shu kit da u briew naduh shnong haduh ban da poi ha surok.
Wat haba la poi ha surok ruh ki shem jingeh haduh katta katta ban ïoh kali, namar ki kali kiba mih na Synia, Mawdoh bad Nongthymmai ki la dap briew lypa. Teng teng lada dei ki shynrang la hap ban kyntiew noh sha tnum kali tang ban lait na kaba kit da u briew.
Kila pynpaw ba ki don ki surok ha ki shnong kiba la pyntrei lyngba ka skhim shispah sngi hynrei namar ba ki dei ki surok khyndew tang mar ïa poi ka aïom slap, kim i dei shuh ki surok bad ym don ki kali kiba lah ban ïaid.
Ha kaba ïadei bad katei ka jingeh, na ka liang ki paidbah ki dawa ba dei ban pynïoh noh da ka surok kaba biang ha kitei ki lai shnong, khnang ba ki paidbah kin lait na ka jingeh ha ka leit ka wan, ka kit ka bah. La kyntu jur ïa ki nongmihkhmat ka Rambrai Jyrngam, ba kin tuklar lem halor kane ka jingeh, khnang ba ka sorkar kan phai khmat lem sha kitei ki shnong.
