Ai por 10 sngi ia ka Sorkar Meghalaya ban plie noh
Guwahati, Nohprah 15 : Ka Kutumba Surakshya Parishad (KSP), ka seng ki Hindu, kala dawa bad aipor 10 sngi ia ka Sorkar Meghalaya ba kan plie biang noh ia ka krem Mawjymbuin na ka bynta ka jinglehniam ki Hindu.
Kane ka seng kala byrngem ruh ban pakhang ia baroh ki surok ba kongsan kiba wan sha Meghalaya ba kynthup ia ka Jorabat ba marjan ka Guwahati, lada kane ka jingdawa jong ki kam urlong hashuwa ka Khristmas.
Ka kynrum kynram halor ka krem Mawjymbuin ha Mawsynram, kaba jngai kumba 60 km na Shillong, kala iaid mynta la katto katne bnai. Kane ka krem ka don ia u mawshun uba ki Hindu ki ngeit ba u dei u Blei Shiva. Hynrei, naduh ka 6 tarik Nailar 2024, ka Dorbar Shnong ka Mawsynram kala khang ia ka jinglehniam hapoh kane ka krem da kaba kdew ia ki daw bapher bapher.
Kane ka kam kala poi ruh sha ka jingbishar jong ka Iingkashari Meghalaya High Court, kaba la bthah ia ka Sorkar Jylla ba kan iakren bad ki kynhun bapher bapher ha kaban iapynbeit ia ka kam.
Wat hapdeng kane, u President ka KSP Satya Ranjay Borah ula kam ba ka Sorkar kam shym la leh eiei ia kane ka kam.
Haba dawa ban plie biang ia ka jingleh niam ki Hindu ha kane ka jaka, ula dawa ia ka Sorkar Jylla ban khanglad ia kino kino ki kam ki bym iahap ha sawdong jong kane ka krem.
U Satya ula kynnoh ruh ia ka Sorkar halor ka jingbym larkam bad jingbym shimkhia ia kane ka kam haba kynnoh ia ki bor ka Sorkar kynthup ia ka Deputy Commissioner bad Superintendent of Police ba ki khlem pyndep iala ka kamram.
Ka KSP kala byrngem ban pakhang lynti ia ki surok ba kongsan kiba wan sha Meghalaya ba kynthup ia ka Jorabat (Guwahati), Paikan (Goalpara), lada ym plie noh ia kane ka krem ban lehniam ki paid Hindu hapoh ka por bala buh.
Ula ong ba lada mih kino kino ki huri hura, ka Sorkar Jylla kan hap ban shim ia ka jingkitkhlieh.
, ka seng ki Hindu, kala dawa bad aipor 10 sngi ia ka Sorkar Meghalaya ba kan plie biang noh ia ka krem Mawjymbuin na ka bynta ka jinglehniam ki Hindu.){kind=link}