Nongpoh, Rymphang 01 : Ka Ri-Bhoi Youth Welfare Organisation (RBYWO) kala dawa ia ka Sorkar Jylla ba kan thung noh da u Block Development Officer (BDO) ba pura ha Umsning Block.
Kane ka Seng kala buh ia kane ka jingdawa hakhmat u Myntri ka Tnad Community & Rural Development (C&RD) Abu Taher Mondal lyngba ka dorkhas bala soi da u Vice President Bah Elvis Kyrsian bad Secretary Kenny Nongrum.
Kat kum ka dorkhas, ka RBYWO kala pyntip ba ka Umsning Block kala treikam khlem u BDO ba pura la lai bnai, u bym lah ruh ban tuklar ia ki kam pisa pilain, kaba la pyndkoh ia ka jingtreikam ka Block bad buh jingeh ia ki paidbah ha ba bun ki liang.
Ka seng ka kyntu ia u Myntri ba un shimkhia lang ia kane ka jingdawa khnang ban lah weng noh ia ka jingeh jong u paidbah uba donkam ia ka jingshakri na kane ka Block ha ki jingdonkam ba mih man ka sngi.
