Shillong, Lber 26: Ka North Eastern Hill University Students’ Union (NEHUSU) ka pynrem jur iaki briew jong ka RSS bad ABVP ha ryngkat ka jingkynnoh ba kila thombor ia u Vice President ka NEHUSU u Samla Easterson Sohtun haka 25 tarik mynta u bnai.
Ka kyrwoh na u secretary ka NEHUSU u samla B Riang ka kdew ba haka por 12:15- 12:45 nohphaisngi ki katto katne ki dkhot ka ABVP bad RSS kila rung ha phyllaw ka skulbah NEHU daka ba kam ban lehkmen Holi ban wanrah ka jingiasngew pher jaidbynriew daka jinglehkmen Holi.
“Ngi dawa naki bor pyniaid ka NEHU ban pynshai mano ba ai jingbit iaki (ABVP bad RSS) ban rung sha phyllaw ka Skulbah. Hadien ba u Vice President ula iohi ia kane ka jinglehkmen holi haka por ba u dang leit iaid lynti ula khot iaki nongpahara ban bthah iaki samla pule na bar ban mih noh na phyllaw namar ka lah ban wanrah ka jingbym sngew shngain iaki samla khynthei kiba lehkmen Holi. Hynrei ha kane ka jingleit kyrpad u vice president ula ngat haka jingshah shoh haki dkhot ka RSS bad ABVP” la ong u samla B Riang.
U samla B Riang ula iathuh ba ha NEHU la ju rakhe iaki jait jinglehkmen kum ka Christmas,Eid, Holi man u snem hynrei ka long kaei kaei sngewsih ba ki kynhun kum ka RSS bad ABVP ki pyrshang ban wanrah ka jingiasngew pher jaidbynriew ka ban ktah iaka suk ka sain hapoh ka skulbah.
“Ngi naka NEHUSU ngi kyntu iaki bor pyniaid ka skulbah ban shim ki sienjam ba tyngeh ia kino kino kiba shah iaki dkhot ka RSS bad ABVP ban rung shapoh ka phyllaw bad kyntu ruh iaki bor Pulit ban kem iaki ba donkti” ula ong.
Ka NEHUSU ka kyntu ruh iaki samla Pule ka NEHU ban long kiba peitngor ban nym ngop haki kynhun kiba pyrshang ban wanrah ka jingiasngew jaidbynriew daka jingia ktah kti.
