Shillong, Risaw 21: Ka Khasi Students Union (KSU) hynne ka sngi thohdieng, kala dawa ia ka Sorkar India ba kan burom ia ka soskular Instrument of Accession (IOA) bala iasoi bad ki 25 tylli ki Hima Khasi (Khasi State) ha ka 17 tarik Nailar 1948 bad ban pyntreikam ia ka Artile 371 hapoh ka Jylla Meghalaya.
“Ngin sap hah jingthoh sha ka Sorkar India ban pyntreikamia ka Standstill Agreement bad ka Annexed Agreement-kaba la sahteng mynta la 75 snem” ong u Bah Lambokstar Marngar, President ka KSU.
“Nalor ka Sixth Schedule, ka Sorkar India ka dei ruh ba pynkupbor ia ka Bri u Hynniewtrep da kaba pyntreikam ia ka Article 371 (A) bad (G) kumba leh ha ka Jylla Nagaland bad Mizoram” ula bynrap.
U Bah Lambok ula pule ia ka rai ba 7 tylli ki mat bala shim ha ka panel discussion halor ka Standstill Agreement, Instrument of Accession, Annexed Agreement bad Sixth Schedule kaba la pynlong hynne ka sngi thohdieng kum shibynta ka jingrakhe ia ka lyngkhuh sngi iap ba 34 snem jong u Wickliffe Syiem, Syiem Khynnah ka Hima Nongstoin.
Une u Nongialam ka KSY ula ong ba ka Sorkar India ka dei ban kynthup noh mardor ia ka ktien Khasi ha ka khyrnit ba phra jong ka Riti Synshar ka Ri India kum ka jingsdang ban burom ia ka IOA bala iasoi bad ki 25 tylli ki Hima Khasi.
“Ka Sorkar Pdeng ka dei ruh ban pyntreikam noh mardor ia ka Inner Line Petmit (ILP) jong ka Bengal Eastern Frontier Regulation, 1873 kumba leh ha Jylla Manipur arsnem mynshuwa. Ngi la daw ai ka ILP la 35 snem mynta” ula ong.
Une u Nongialam ka KSU ula ong b aka Federation of Khasi State kan wad ia ka lad ka lynti ban kynthup lang ia ki Khlieh Nongsynshar kynthup ki Daloi bad ki Waheh Chnong jong ki elaka ka Ri-lum Jaintia.
Kane ka jingialang kala rai ruh ban wanrah noh ia ka National Anthem jong ki paidbah ka Bri u Hynniewtrep.
“Ngin sa iakren bad ka Sorkar India halor ka jingdonkam ia ngi ban don noh la ka jongka National Anthem namar ngim sngewthuh wat shi kyntiew ruh ia ka National Anthem jong ka Ri India bad ha kajuh ka por kane ka jingrwai bala rwai da u Rabindranath Tagore kam shym la kynthup lang ia ngi. Namar kata, ngi sngewthuh shai ba ngim dei ki nongshongshnong ka Ri India ha katei ka por ba ki shna ia ka National Anthem kata ha u snem 1911”ong u Bah Lambok.
Ki Nongkren ha kane ka panel discussion ki kynthup ia u Bah Spiton Kharakor, CEM barim ka KHADC Bah PN Syiem, MDC ka Jaiaw bad President barim ka KSU Bah Paul Lyngdoh, Nongaiktien ka FKS John F Kharshiing bad President ka HNYF Bah Sadon Blah.
U Khun jong u Wickliffe Syiem u Andrew Shalomar bad u para kila wan ban iashimbynta ha kane ka prokram bad kren ruh halor ki jingeh jong ki paid Khasi ha Bangladesh .
“Lada ngi klet noh ia ki tynrai ba ngi dei ki Khasi bad kylla long Muslim, ngi lah ban im hangtei ha ki 50 snem ban wan hynrrei lada ngim leh ia kata, kan dei kaba eh ia ngi ban im. Namar kata, nga kyrpad ia ki briew jong ngi hangne ban iapyrkhat lem n aka bynta jong ngi lada ngim ioh jaka shuh ban sah ha hangtei” ula ong.
