Shillong, Lber 22 : KSU-SWKH kala mih shakhmat ban dawa biang na ka sorkar jylla ban ai iaka Communitty & Rural Development Block ha Umdohlun ne Wahkaji kiba hap ha South West Khasi Hills.
U President ka KSU South West Khasi Hills u samla Forwardman Nongrem ula ong, ka seng ryngkat bad ki paidbah kila dawa naduh u snem 2015 ban buh iaka C&RD Block ha Umdohlun ne Wahkaji hynrei haduh mynta ka sorkar kam shim la pynurlong ia katei ka jingdawa.
Ula iathuh ba kila dep iakynduh ia u Myntri sorkar ha ki snem ba la dep ban sawa thaw iaka Block ha katei ka thain kaba dang sahdien bha khantam haba ki paidbah katei ka thain ki hap ban shong kali haduh 2 ne 3 kynta ban leit sha Mawkyrwat ne Ranikor.
Pule lang ia kane: VPP’s double standards exposed with Hindi version in election manifesto
U samla Forwardman ula pynpaw iaka jingsngewtynnad ba ki nongmihkhmat kila kren ia katei ka mat hapoh iingdorbar.
Ula ong, ka seng kan sa pyrshang ban leit iakynduh ia ki bor sorkar bad lada ka sorkar kam shimkhia ban ai iaka jingdawa, ka seng kan lum iaka jingialang bad ki nongsynshar shnong ryngkat bad kiwei pat ki sengbhalang na ka bynta ban pynjur iaka jingdawa ka jong u paidbah ka thain.
Ha kawei pat ka liang, u General Secretary ka KSU SWKH u samla Jiedskhem Nongsiej ula ong ba ka seng ryngkat bad kiwei pat ki sengbhalang ka Mawsynram la bun snem, kila dawa na ka sorkar ban kyntiew kyrdan noh ia ka Mawsynram C&RD Block sha ka Civil Sub Division namar kala buh ha ka jingeh ia ki paidbah ba kin leit shaduh nongbah Shillong kaba jngai kumba 50 ne 60 Km ban pyndep ia ki kam ki jam.
Ula ong, haduh mynta ka jingdawa ki sengbhalang ban kyntiew kyrdan sha ka CSD kam shim la urlong satia.
Ngim pyrshah ba ka sorkar kan ai C&RD Block ne Civil Sub Division ia ki jaka kiba don ha kylleng ka jylla, hynrei ngi kwah pat ba ka sorkar kan phaikhmat lem iaka jingdawa ki paidbah ha Umdohlun bad Wahkaji.
