Shillong, Jylliew 17: Ka Khasi Students Union (KSU) ka la dawa na ka National Law University (NLU), Meghalaya, ba ka dei ban pynkylla mardor ia ka jingpynbna ba dang shen ban thungkam ia ki kam Assistant Professor bapher bapher hapoh ka skulbah.
Haka shithi sha u Registrar jong ka NLU, ka KSU ka la pynpaw ia ka jingpyrshah halor ka jingpynbna laitkam ba la pynmih da ka National Law University Meghalaya ha ka 9 tarik Jylliew 2025, ban thungkam ia 39 ngut ki Asst. Professor, kaba la dawa ban don ki kyrdan kiba palat pud ba hap ban pynbiang da ki kyrtong trai Jylla.
Ka KSU ka ong ba kat kum kane ka jingpynbna laitkam, ka jingdonkam (eligibility) ba ka NLU ka buh ka long shaba palat ban ia kiei ki kyndon ba ka UGC ka buh ne kiwei kiwei ki 26 tylli ki NLUs ha ri India ki ju leh bad kine kiei kiei baroh ki dei ki jingleh u Vice Chancellor khnang ban pynduh ia ki trai jylla ba kin ioh ban aplai.
Ka KSU ka ong ba ki kyndon ba donkam (entry level) na bynta ka post Asst. Professor dei Academic Level 10 hynrei katkum ka advertisement ka NLU ka pan Academic Level 11. Ban ioh academic level 11, ki nonghikai ki dei ban ioh rung shuwa kum Asst. Professor bad hadien ba la trei 4 snem shaneng kin sa ioh promotion sha ka Academic level 11. Te kumno ba ka NLU kan buh ia ka kyndon Academic Level 11 bad kane ka la pynkhein ia ka kyndon UGC.
Ka KSU kala kynthoh ruh “Shuh shuh la ju iohi barabor ba ki nonghikai bym dei Khasi ba trei ha NLU mynta ki thoh artikle halor ka jingpyrshah ka jong ki ia ka Meghalaya Reservation Policy bad ki thmu ruh ban pynkylla ia ka reservation policy ha NLU ba kin ioh kam pura ma ki bad ba kin pynduh ia ki trai jylla bad dei halor kane ka nongrim ba une u VC u buh ki kyndon kiba eh khnang ba trai ri trai muluk ki nym ioh ban rung ha katei ka University khnang ba ki kam bamsap bad ki kam jyrsieh jong u VC kan dang iaid shakhmat khlem don ba pynthut”.
“Hadien ba ka Seng ka la sei madan ia ki kam bamsap jong u VC bad ki kam thep tuh ia ki briew ki jong u ha NLU, la bun ngut na ki nonghikai kila resign noh na ka kam da kaba sheptieng ia ka jingtohkit. Ka jingleh ka jong u VC mynta ia kane ka jingpynbna laitkam ka dei beit thik ba nym don ba ioh ban aplai bad ba un dang ioh ki briew jong u ban thep tuh khnang ba un lah ba tap eit miaw ia ki kam tuh ki jong u” kala kynnoh.
Ka Seng ka la kyrpad ia Registrar ka NLU ban pynkylla ia ki kyndon (criteria) na bynta ka kam Asst Professor ha NLU bad ban bud ryntih ia ki kyndon jong ka UGC.
“Ban pynshongnia bad pynshong nongrim ia kane ka jingdawa jong ka Seng, ka Seng kum ban ai nuksa ka la tyrsat ruh ia 10 tylli ki advertisement jong kiwei ki NLUs jong kiwei ki jylla kiba pynlait advertisement jong ka post Asst. Professor kiba iaid thik katkum ka kyndon UGC” kala ong.
 ka la dawa na ka National Law University (NLU), Meghalaya, ba ka dei ban pynkylla mardor ia ka jingpynbna ba dang shen ban thungkam ia ki kam Assistant Professor bapher bapher hapoh ka skulbah.){kind=link}