Nongpoh, Naiwieng 01: Ka Khasi Students Union (KSU)- Nongpoh Circle kala dawa ban weng noh ia ki CRPF na ka khyrdop lum khajna jong ka National Highway Authority of India (NHAI) ha Pahammawlein, namar ka jingshah shoh uwei u nongniah kali uba dei u Khasi bad shah pynjulor ruh ka kali kaba u niah ha kine ki briew ka ain.
Kane ka jingshah shoh u nongniah kali kala jia hynnin ka miet ha kane ka khyrdop bad halor kane ka jingjia, ka KSU kala khot hajir ia u Manager jong ka kompani ba pyniaid ia kane ka khyrdop ha ka 3 tarik Naiwieng hapoh ka Ophis treikam jong ka seng.
Kane ka jingdawa ban weng ia ki CRPF kala mih ruh hadien ba ki Nongialam ka KSU dalade kila hiar sha ka Ophis treikam jong kane ka khyrdop lum khajna ban tohkit ia kaei kaba jia bad dei hadien ba kila peit na ki video bala ring lyngba ka CCTV la shem ba ki CRPF kila shu leh donbor ia une u nongniah kali.
Haba iakren bad ki nongthoh khubor, u samla Baiashanlang Kharshanlor, Organising Secretary ka KSU-North Khasi Hills, ula pynrem jur ia ka jingleh donbor ki CRPF haba pyntip ba ka Seng ka daw aba dei ban weng noh mardor ia kine ki briew ka ain lem kumta kan pynbor ia ka seng ban shim da ki lynti kiba tyngeh.
Ha kajuh ka por, u pyntip ba ka KSU kala iohpdiang ia shibun ki jingujor pyrshah ia u Manager jong kane ka khyrdop bad dei namar kane, ka seng kala khot hajir ia une u Manager ha ka 3 tarik Naiwieng.
Ula ong ba lada une u Manager um poi sha ka Ophis ka Seng ha Nongpoh ha kane ka sngi, ka Seng kan pynshitom da kaba tyngeh ia une u briew.
