Shillong, Risaw 01: Ka Khasi Students’ Union (KSU) ka la dawa ban pyndam bad khein iap ia ka result ba la pynbna dang shen na ka bynta ka eksamin Staff Nurse bad ANM hadien ba mih ki jingujor ba don ki jingleh bym hok bad kabym long kat kum ka jingkhmih lynti.
Ha ka shithi sha ka Myntri ka tnat ka koit ka khiah ka Kong Ampareen Lyngdoh, u Chairman ka Employment Monitoring cell samla Reuben Najiar u la ong, “Ngi kyntu ba ia ka result ba la pynmih ha ka 28 tarik Naiwieng, 2024 na ka bynta ki staff nurse bad ANM dei ban pyndam noh bad dei ban tohkit daka tnat pyrshah ïa u/ki briew kiba donkti ha ka jingpeit bniah bad jingpynmih ïa ka result bad dei ruh ban sospon”.
“Ka Union ka kyrpad ruh da ka jingsngewrit ïa phi ba dei ban pynmih paidbah ïa baroh ki mark jong ki kyrtong bad kino kino ki kyrtong kiba sngew ba ki la ïoh duna ïa kaei kaba ki dei ban ïoh, ki lah ban peit ïa ki OMR sheet jong ki bad kumjuh ruh dei ban pynbiang ïa ka kopi sha ki. Kane kn dei ka sienjam kaba kongsan ban wanrah ïa ka jingshaniah bad jingngeit jong ki kyrtong ha ka rukom pyniaid ia ka thungkam thungjam,” u la ong.
La pynbna ia ka result jong ka written eksam jong ki Staff Nurse bad ANM ba la pynlong da ka Meghalaya Medical Services Recruitment Board (MMSRB) ha ka 28 tarik Nailur.
Ka KSU ka la ong ba na ka bynta ka post staff nurse la kdew ia ka syllabus ha ka advertisement kaba don 5 (san) tylli ki sobjek ki ban kit 20 mark kawei kawei hynrei ha ka sngi eksamin, ki kyrtong ki la kyndit bad lyngngoh ban lap ba ki don 13 tylli ki jingkylli ki bym iadei bad ki sobjek kumba la kdew ha ka jingpynbna. Ki kyrtong ki sngew ba ki la shah thok ha ka Recruitment Board kaba la iaid lait na ka jingpynbna (Advertisement).
Ka KSU kala ong ba ha ka result kaba la pynbna ha ka step jong ka 28 tarik, la iohi ba ki don ar tylli ki roll number kiba la paw arsien ha ka thup jong ki kyrtong kiba pass. Ka Board ka la pynmih biang ia ka result kaba ar ha ka por janmiet da kaba bujli ia ka result kaba nyngkong.
Hadien ba la pynbna ia ka jingmih kaba ar, ka la plie ia ka pandora box ha kaba lah ban iohi ba la pyndap tam ia u nombor 46 (sawphew hynriew) ha ka result bad ki don ruh haduh 7 (hynriew) tylli ki roll nombor kiba la paw arsien.
Ka jingpynkylla biang ia ki roll nombor ym lah ban niew kum kano kano ka jingbakla type hynrei ka long kaba thikna eh ba la shna thok ia ka thup. Ka jingpynbna ar tylli ki result ha kajuh ka sngi ka pynmih ruh ia ka jingbym shai bad ka jingleh thok ia ki kyrtong kiba dei hok. Lah ruh ban pynpaw ba ka tarik ban leh ia ka physical verification ia ki katto katne ki roll nombor la kdew ba kan long ha u snem 2025, 2026, …, 2028 kaba long kaba sngewsih jur na ka bor thung kam. Kane ka pyni ia ka jingbym lah ban treikam hapdeng ki bor ba dei peit ban pynbna ia ki jingmih.
 ka la dawa ban pyndam bad khein iap ia ka result ba la pynbna dang shen na ka bynta ka eksamin Staff Nurse bad ANM hadien ba mih ki jingujor ba don ki jingleh bym hok bad kabym long kat kum ka jingkhmih lynti.){kind=link}