Shillong, Nailar 24: Ka Khasi Hills Autonomous District Council (KHADC) kala dawa ia ka Sorkar Jylla ba kan ym pyntreikam satia ia ka ain Code of Criminal Procedure (CrPC) bad Code of Civil Procedure (CPC) ha ki jaka jong ki paid riewlum ne Schedule Areas.
Kane ka jingdawa kala mih na u Chief Executive Member (CEM) Bah Titosstarwell Chyne, uba la phah da ka shithi sha u Myntri Rangbah ka Jylla Conrad Kongkal Sangma hynne ka sngi. Kane ka shithi ka dei kaba la iasoi da ki 21 ngut ki MDC jong ka Council.
U CEM u pyntip ba ula dep khot ia ka jingialang jong baroh ki MDC ha ka 1 tarik Nailar 2022 ban iatai ia ka jingtyrwa ban pyntreikam ia ka CrPC bad CPC ha baroh kawei ka Jylla.
“Ki MDC ka KHADC kila shim rai ban pyrshah ia ka jingpyntreikam ia ka CrPC bad CPC ha ki jaka riewlum ka Jylla naba ki MDC ki sngew ba lada pyntreikam ia kine ki ain, kan sa ktah jur ia ka bor treikam jong ki Iingkashari District Council” ula ong.
“Ka jingktah kan long ruh ia ki iingkashari Shnong bad ki Additional Sub-Ordinate District Council Court” ula bynrap.
Namar kata, ula kyntu ia u Myntri Rangbah bad ia ka Sorkar ba kan ym pyntreikam satia ia kine ki ain ha ki jaka riewlum ka Jylla.
“Hynrei lada ka Sorkar ka kwah ban pynkupbor ia ki Iingkashari kiba don ha kylleng ki District ba kin shong bishar ia ki mukotduma ba don jingiadei bad ki Bar Jylla, ka lah ban pyntreikam tang ia ki katto katne ki kyndon ka CrPC bad CPC kata ruh hadien ka jingiakren bad baroh ki kynhun ba don bynta ha ka kam” ula ong.
