Shillong, Risaw 05 : Ka Khasi Authors’ Society (KAS) kala shim ia saw tylli ki rai ba kynthup ia ka jingdawa ia ka Sorkar Pdeng ba kan wanrah noh da ka Official Bill ha kaban pynrung ia ka ktien Khasi ha ka khyrnit ba phra jong ka Riti Synshar ka Ri hapoh ka Dorbar ban wan jong ka Iingdorbar Parliament.
Ia kane ka rai la shim hadien ka jingjop ka jingpynlong ia ka National Seminar halor ka ‘Ktien Khasi, ka thoh ka tar bad ka kolshor’ ha Delhi lem bad ka jingiakhih ba jai jai ha Jantar Mantar kaba long ha ka 29 bad 30 tarik Nailur.
Haba iakren bad ki nongthoh khubor hynne ka sngi Palei, u President ka KAS Dr DRL Nonglait ula ong “Ngi la rai ban kyrpad ia ka Sorkar India lyngba ka Ministry of Home Affairs ban shim ia ka sienjam ha kaban wanrah da ka Official Bill ha ka dorbar ban wan jong ka Parliament namar kane kan dei ka lynti ha kaban pynrung ia ka ktien Khasi ha ka khyrnit kaba phra jong ka Riti Synshar ka Ri India. Ka Sorkar kan hap ban pynkylla ia ka khyrnit ba phra ban pynrung ia kino kino ki ktien ba kin long noh shibynta jong ki ktien ha ka khyrnit ba phra”.
Ula ong ba ka KAS kala rai ruh ban pan ia ka jubab na ka Ophis u Myntri kam Pohiing ka Sorkar India ban tip hangno kala poi ka dorkhas ba dawa ban pynrung ia ka ktien Khasi ha ka khyrnit ba phra ka riti synshar ka Ri.
U pyntip ba ka KAS kala iakynruh ruh ia u Myntri kam pohiing arim Rajnath Singh ha u Kyllalyngkot 2019 bad ia u Myntri kam pohiing ba mynta ha ka 24 tarik naitung, 2021 ha Shillong.
“Hynrei ngi dang ioh ia ka jubab na ka MHA tang ha u Lber 2019 bad hadien kane ngim shym la ioh jingtip shuh, ym don satia ka jingaiktien na ka Ministry sah ka KAS lane wat sha ka Sorkar Jylla. Ta ka daw ngi la shim ia ka rai ban pan ia ka jubab na ka Sorkar India” ong u Dr Nonglait.
Kat kum ka jingong jong u, ka KAS kan ap ia ka dorbar ban wan jong ka Parliament hashuwa ban shim ia kano kano ka rai halor ki sienjam ban sa shim hadien habud.
