Shillong Risaw 22: Ka Jaintia Students Union (JSU) Khliehriat Circle kala ai da ka dorkhas ha u Myntri ka tnad Social Welfare Bah Paul Lyngdoh, kaba dawa ban tei iaka Drug Addiction Rehabilitation Centre, ka ban ai jingsumar ia kiba la kyrni Drok hapoh East Jaintia Hills.
Katkum ka dorkhas na u President ka JSU Khliehriat Circle samla Livingson Sama bad u Secretary u Ajoymeson Lyngdoh, la iathuh ba ha ka jingiakynduh ia u Bah Paul Lyngdoh ryngkat ka jingdonlang u Myntri ka Sorkar Jylla Bah Kyrmen Shylla, ka seng kala ai jingmut ia ka sorkar ban bhah lang iaka East Jaintia ban ioh shna iaka jaka sumar ia kiba la kyrni drok ne ka Rehabilation Centre namar ka East Jaintia kadei kawei na ki jaka ba kham kynrei kiba dih drok bad kadei ruh ka jaka ba rung ba mih u drok shapoh ka jylla.
“Ka seng kala pynsngew ba ka East Jaintia kadei hok ban ioh ia kane ka jaka ai jingsumar ia kiba kyrñi drok khamtam ba ki khun samla ka thaiñ kin lait na une u jingdih pynbuaid uba la ialam bakla ia ka jingim jong ki” ong ki nongialam ka JSU .
Kila iathuh ba na ka liang u Myntri ka Sorkar Jylla ula kular ban shimkhia ia kane ka jingai jingmut ka seng bad u lah bthah ia ki bor kiba dei khmih ban wad jaka kaba biang bad kaba paka ban buh ia ka Rehabilation Centre hapoh katei ka thaiñ.
