Shillong Kyllalyngkot 23: Ka Jaintia Students Union sengkmie hynne ka sngi Baar, kala iakynduh ia u Myntri Rangbah ka jylla u Conrad K Sangma bad ia u Symbud Myntri Rangbah Bah Snaiwbhalang Dhar bad dawa pynrung iaka ktien Jaintia haka State Anthem bad ban pyrshah jur ia ka jingthmu wanrah iaka lynti rel ha Ri-lum Jaintia.
Ki nongialam ka JSU kila aiti da ka dorkhas ia u Myntri Rangbah bad ia u Symbud Myntri Rangbah ka jylla, ha ka jingwan plie ka jong ki iaka Stadium ha Wahiajer.
U General Secretary ka JSU samla TR Suchen ula iathuh ba ka seng kala pynsngew sha u Myntri Rangbah bad sha u Symbud Myntri Rangbah, ba ka Jaintia ka dei ban paw lang ha ka thup State Anthem bad kat kum ka dorkhas la pynpaw ba ia ka Jaintia National Durbar la thaw naduh u snem 1900 ban iakhun ban dawa Hill State ha kitei ki por bad ia ka jylla ruh lah ioh na ka Assam ha u snem 1972 dei ba lah shim na ar tylli ki ditrik ka Assam ka United Khasi and Jaintia Hills bad ka Garo Hills.
Ha kajuh ka por, ula iathuh ba ka seng kala pynsgew ruh markhmat u Myntri Rangbah, ba ka sorkar da lei lei kam dei ban wanrah iaka lynti rel ha ri lum Jaintia namar kan ktah ia ka jingbuhai shnong ki mynder.
Ula ong ba katba ka jylla kam pat don aiñ kaba biang ban pyrkhing iaka jingrung kyrthep ki mynder ri, ka Sorkar kam dei ban wanrah ia ka lynti rel.
Ka JSU kala dawa na u Myntri Rangbah ba dei ban wanrah shuwa ia ka aiñ ILP bad ban sa ia peit pat hadien ban ia pdiang iaka lynti hapoh rilum Jaintia.
U nongialam ka JSU ula pyntip ba na ka liang u Myntri Rnagbah ula pynpaw ba un sa shimkhia halor kine ki jingdawa ka seng bad un sa pynsngew lang sha ki para Myntri hapoh ka jingialang jong ka kynhun Myntri.
