Shillong, Jylliew 06: Ka Jaintia Students Union (JSU) Shillong Circle, hynne ka sngi Thohdieng, kala leit kynduh ia u Commissioner & Secretary u Vijay Kumar Mantri ban kyntu ba un ïakren lem bad ka Sorkar lem bad ia ka National Testing Agency ban buh ki jaka thoh eksamin Common University Entrance Test (CUET) ha Jowai West Jaintia.
U Adviser ka JSU samla A Suchiang u la ong ba kumba ka long mynta, bun ki samla pule na Jaintia Hills ki hap ban leit sha ki jaka ba jngai kum sha Nongbah Shillong ne sha kiwei ki jaka ba jngai ban iakhun ia ka eksamin CUET.
U la ong ba kane ka buh jingeh ïa ki samla kiba kwah iakhun iaka eksamin CUET khamtam ha ka leit ka wan namar ka jingjngai, ha kaba ki samla bunsien ki hap ban mih dang step bad wan phai janmiet shala iing, kaba wanrah ia ka jingkhuslai bad jingtlot bor met bad jingmut jingpyrkhat khamtam ha ka por eksamin.
U la ong ba ka jingdheng kali ha ka nongbah Shillong ka dei kawei pat ka jingeh ia ki samla pule, kaba pynlong iaki samla ban slem bad poi shaki jaka thoh eksamin.
“Ka jingeh ka long ruh ha ka liang ka pisa tyngka na ka bynta ki samla pule kiba wan naki longïing ba duk, kaba buh jingeh iaki ban pynbiang iaka bai leit bai wan, ka bai bam bad jaka sah lada jngai palat ka jaka thoh eksamin”.
U Adviser u la pyntip ba ha ka jingïakynduh, na ka liang u Commissioner & Secretary u la pynthikna ba yn sa phah ïa ki ophisar ban leit jurip ïa ki katto katne ki institute ne kino kino ki centre kiba biang na ka bynta ban buh ïa ka jaka thoh eksamin CUET ha Ri-lum Jaintia .
“Naka liang ka JSU, ngi long kiba kloi ban iatreilang bad ka Sorkar bad ban ai kano kano ka jingiarap kaba donkam na ka bynta ban pynthikna ha ka ban ioh iaki jaka thoh eksamin ha Jowai ” u la ong .
