Shillong Nailur 06: Ka Jaintia National Council (JNC) hynne ka sngi Balang, kala dawa na ka Sorkar Jylla ba kan pynsted noh ia ka jingtei iaka Iawmusiang bad ka Mini Secretariat ha Jowai, kaba dei ka District Headquarter jongka West Jaintia Hills.
Ha ka dorkhas kaba la aiti ha u Symbud Myntri Rangbah ka jylla Bah Sniawbhalang Dhar uba khmih iaka kam pynroi sor, ka JNC kala ong, “Ngi kyrpad iaka ophis jong phi, ban shimkhia halor kitei ki mat kata ban pyndep noh ia ka jingtei iaka Iawmusiang bad Mini Secretariat ha Jowai bad ban pyntreikam noh ia ka Residential School bad ia ka Teachers Training Centre ha East Jaintia Hills District.”
“Ban pyntreikam iaka Teachers Training Centre ha East Jaintia Hills District ka long kaba donkam kyrkieh, khamtam ha ka por ba don ka jingkylla lyngba ka jingpyntreikam iaka New Education Policy (NEP) 2020,” la pynpaw ha ka dorkhas.
Ka JNC kala ong baka jingtyrwa ban tei pynbha iaka Iawmusiang la bhah tyngka T.20.09 klur da ka Ministry of Development of North Eastern Region (DONER), ha kaba la dep ban pyllait iaka T.6.33 Klur kum ka bhah tyngka kaba nyngkong.
Ka jingtei iaka ïew la pynsangeh bad haduh mynta la shu pynsahteng la palat iaka shiphew snem bad kane kala ktah jur ia ka kamai kajih jong ki briew kiba shaniah tylli ha katei ka ïew.
“Halor kane, ngi kyntu jur ia ka ophis ka jong phi ban khmih lem halor kane ka mat bad ban shim ia ki lad ki lynti ban bhah ia ka tyngka na ka sorkar jylla ban pynsted noh iaka jingtei ia ka Iawmusiang” la pynpaw ha ka dorkhas.
Ka JNC kala pynkynmaw ruh ba ka sorkar jylla kala tyrwa ban tei iaka Mini Secretariat (Integrated Development Complex) ha man la ki district da ka jingthmu ban pynjan iaka jingai jingshakri ka sorkar ia ki paidbah.
Kila pynapw ba hadien ba la dep ban pynkynriah iaka ophis jongka PWD, Jowai North Division sha Shangpung, u Myntri Rangbah ka jylla u Conrad Sangma ula buh ia u mawnongrim ha ka 3 tarik u Nohprah 2022 ban tei iaka Mini Secretariat ha Jowai. Ka sorkar jylla kala dep ban bhah iaka pisa T.19.83 Klur ban tei ia katei namar ba ka jingdon jong ka DC ophis markhap eh bad ka ïew bad hapdeng jongka nongbah bad kan pynthud iaka leit ka wan jongki paidbah bad kam don ruh ia ka jaka pynieng ia ki kali.
“Kumta ka JNC ka don ia ka jingsngew ba da ka jingtei kloi iaka Mini Secretariat ha Jowai kan pynsuk ia ka jingeh kaba mad da ki paidbah bad da ka jingdep ban tei iaka Mini Secretariat, kan ai jingmyntoi iaki paidbah jongka district namar ba kin ioh iaka jingshakri na baroh ki tnad sorkar kiba don lang hapoh jong kawei ka tnum ïing” la ong ka JNC.
Kila kyntu ruh ia u Symbud Myntri Rangbah ban pynsdang noh iaka jingtei ne ban pynsdang treikam noh shwa shipor iaka Mini Secretariat haka ophis treikam kaba la don lypa jongka PWD Jowai North Division.
 hynne ka sngi Balang, kala dawa na ka Sorkar Jylla ba kan pynsted noh ia ka jingtei iaka Iawmusiang bad ka Mini Secretariat ha Jowai, kaba dei ka District Headquarter jongka West Jaintia Hills.){kind=link}