Shillong, Naitung 22 : Ka Jaintia National Council (JNC) hynne ka sngi saitjain kala dawa na ka sorkar jylla ban pynurlong ia ki jingkular ki jongka da kaba tei noh ia ka Mini Secretariat ha Jowai.
Katkum ka kyrwoh khubor na u publicity cell in-charge bah Mebanteilang Sukhlain ula ong, ba dei ban tei ia ka mini secretariat ha Jowai kumba la tyrwa da ka sorkar jylla ban tei ha Tura, West Garo Hills District.
Ula pynkynmaw ia ka sorkar ba kala dep ban buh ia u mawnongrim ban tei ia ka mini secretariat ha Jowai ha u bnai Nohprah jong u snem ba la dep, hynrei haduh mynta ym shim la iohi ia ki dak ki shin ia ka jingsdang ia kane ka projek.
U Bah Sukhlain ula buh jingkylli hato ka jingbuh mawnongrim kadei thik na ka bynta ka kam elekshon?
Kane ka jingdawa kadei ruh kum shi bynta jongka jingkren u Myntri Rangbah ka jylla ba ka jingtei iaka mini secretariat ha Tura kadei ka lynti ban shimkhia halor ka jingdawa iaka winter capital. U Myntri Rangbah ula ong ruh ba yn bhah tyngka bun bad ka jingkylla kaba bun bah ha ka liang jong ka kam synshar khaddar ha Tura.
“Namar kata, ngin sa iohi ia ka jingkiew ha baroh ki liang ha ka jingsam ia ki skhim bad ka jingdon jong ki bor synshar kan khlain bha ha ki sngi bad ki snem ban wan” ong u Myntri Rangbah bad ka pyntip ba ka jingtei iaka Governor House ha Tura lah jan dep artad.
U Bah Sukhlain ula ong, ba ka Jaintia Hills kadei kaba pynmih bun tam ia ka khajna ha ka jylla hynrei kaba sngewsih ka long ba kadei pat ka thain kaba la shah iehbein bha, “Kaba mut haduh mynta ka sorkar ka shu shim kam ju ai”.
Ula buh jingkylli ruh halor ka jingpynslem ka sorkar ban tei pyndep ia ka Iawmusiang market complex, kaba la sahteng naduh u snem 2006.
Ula kynnoh ba watla ia ka pisa la dep ban bhah man la u snem hynrei haduh mynta ym pat lah ban tei pyndep ia kane ka projek.
“Ka Council ka kwah ruh ban buh jingkylli, hato ka Jaintia Hills kam don ia ka hok ban ioh iaka roi ka par?” la buh jingkylli u Sukhlain bad ka pynkynmaw ia ka sorkar ba ka rilum Jaintia ruh ka donkam ia ka roi ka par.
Pule ruh: Rai ki Regional Committee ka Ri-Bhoi bad Assam ban sdang jurip pud naduh 26 tarik Nailar
