Shillong, Nailar 03 : Ka Jaintia National Council (JNC) ha ka sngi Palei kala dawa ia ki bor District ka East Jaintia Hills ba kan pynsangeh ha kaban pynlong ia ka Public Hearing jong ka M/s Meghalaya Cement Ltd bad ka M/s Green Valley Industries Ltd bala buh ban pynlong ha ka 24 bad 25 tarik Nailar.
Ha ka shithi bala phah sha u Deputy Commissioner ka District, u President ka JNC Sambormi Lyngdoh ula ong ba ka Council ka pyrshah jur ban pynlong ia ka Public Hearing ha ka 24 tarik ban pynheh ia ka M/s Meghalaya Cement Ltd ha shnong Thangskai bad ha ka 25 tarik jong ka shale mining ka M/s Green Valley Cement Ltd ha Brichyrnot.
Haba pynpaw ba ka jingpyrshah ka dei kaba la pynshong nongrim kat kum ka hok, u Bah Sambormi ula ong ba ka jingdon jong kine ki kompani ha ka District kam shym la pyndap ia ka jingdonkam jong ki trai shnong bad ka District baroh kawei haba iadei bad ka iohkam iohjam jong ki samla bala nang la stad.
Ia mynta, tang khyndiat ngut eh na ki trai shnong kila iohkam ha ki kompani dewbilat ha ka District.
“Ka long kaba donkam ban pyntip ba baroh ki kam bah eh kyrdan ha kine ki karkhana ki dei kiba la thung da ki briew kiba nabar ka Jylla bad kyntait ia ki samla trai shnong kiba don ia ka kyrdan bad ba lah ban trei ia kitei ki kam” ula ong.
Haba phai pat sha ka roi ka par jong kine ki thain, ula ong ba kine ki kompani kala synniang khyndiat eh sha ki kam pynroi ha kine ki thain watla ka jingiai kyrpad n aka por sha ka por lyngba ki Business Model jong ki kaba la iatip kum ka Corporate Social Responsibility (CSR).
Pule lang ia kane: Manipur : Khot pakhang shnong ka CoTU ba dap 90 sngi ka thma iapher Jaidbynriew
Peit lang ia kane
