Dawa ka HYC ia ka Sorkar ban shimkhia ia jingshlei um bad shah rong ki jaka puta ha thain Shella

Shillong, Nailar 06: Ka Hynniewtrep Youths’ Council (HYC) hynne ka sngi kala phah daka dorkhas sha u Myntri ka tnat Water Resources Bah Comingone Ymbon ba kyrpad ban shimkhia mardor ban pynduna ia ka jingshah rong um ki jaka bad ban ai ka jingiada na ka jingshlei um ha ka thain Shella, East Khasi Hills district.

Ka HYC kala ong ba ka jaka kaba don sharum ka wah Umiam, ka ju shah ktah ha ka jingshlei um bad ka jingshah rong um ki jaka puta, kaba ju pynjulor jur ia ki jaka rep, ki mar ki mata, bad iaki lad kamai kajih jong ki nongshong shnong.

“Kumta, ngi kyntu ia phi, ba phin sngewbha ban shim ia ki sienjam kiba kyrkieh bad kiba donkam ban pynduna ia kane ka jingeh da kaba shna ia ki jingker, ki kynroh bad kiwei pat ki jingtei ban iada harud ka wah Umiam hapoh ka Shnong Shella naduh Pyrkan haduh Kalatek, hajan khappud ka India-Bangladesh” ong u president ka HYC u bah Roykupar Synrem.

Ka HYC kala kam ba da ki hajar akar ki jaka rep ki la shah rong noh ha ka um, bad ki mar ki mata ki la shah pynjot namar ka jingshlei um kaba ju jia man ka por.

Kala kam ba ki trai jaka bad ki nongshong shnong kiba shah ktah ki la pynpaw bunsien ia kane ka mat sha ki bor ba dei peit, hynrei kine ki bor ka Sorkar kim shym la shimkhia haduh mynta.
Ha ka thaiñ Kalatek jong ka Shnong Shella, kumba 19 hectare ka jaka ka la shah rong noh ha kine ki 10 snem ba la dep, kaba la pynlong ïa ka jingduhnong kaba khraw ïa ki jaka rep bad ki mar ki mata jong ki nong shong shnong.

Kane ka la wanrah ruh ia ka jinghiar ha ka jinglah ban pynmih ha ka rep ka riang namar ka jingkylla rong jong ka um bad ka jingkylla sniew ka khyndew kaba la ktah ïa ka jingim jong kiba bun ki longïing kiba shaniah ha ki kam rep.

U President ka HYC u la ong ba ka Meghalaya State Disaster Management Plan ka la kam ruh baka don ka jingma jong ka thain namar ka jingshlei um bad jingtwa khyndew.

“Kumta, ka long kaba donkam eh ba dei ban shim ïa ki lad ki lynti kiba kham kloi ban pynduna ïa kine ki jingma bad ban shim iaki sienjam ban ïada ïa ki jaidbynriew kiba rit paid kum ki paidbah jong ka Shnong Shella na ka jingduhnong kaba ju mad man ka por namar ka jingshlei um bad ka jingbtuid khyndew,” u la ong.