Dawa ka HYC ban pynsangeh ia ka jingthungkam M&HO ba khlem iaid kat kum ka Reservation Policy

Shillong, Risaw 14: Ka Hynniewtrep Youths’ Council (HYC) ha ka sngi Ba-ar, ka la dawa na ka Sorkar Jylla ban pynsangeh noh ia ka jingpynrung kam ban pyndap ia ki 21 tylli ki kam Medical and Health Officers (M&HO) da kaba kdew ba kam iahap bad ka rukom bhah kam sha ki lai ngut ki riewlum trai ri trai muluk kat kum ka State Reservation Policy.

Hashuwa kane ka HYC hapoh ka jingïalam u President Bah Roykupar Synrem ka la ïakynduh bad aiti da ka Dorkhas sha u Commissioner bad Secretary ka tnat ka koit ka khiah u Joram Beda, ba dawa tuklar ïa ki jingkynnoh ba ka don ka jingbym ïahap ha ka rukom bhah ïa ki kam ba lait kumba la pynbna ha ka Result jong ka MMSRB bala pyllait haka 8 tarik Risaw.

Na ki 21 tylli ki kam M&HO, 4 tylli ki kam la mang sha ki Khasi bad Jaintia (19%), 11 tylli sha ki jaidbynriew Garo (53%), 2 tylli unreserved category (9.5%), bad 4 tylli Other Scheduled Tribes/Other Scheduled Castes) (OST/OSC) (19%).

Ka HYC ka la kdew ba kane ka jingai bhah ka paw ba kam iahap bad ka Meghalaya State Reservation Policy jong u snem 1971, kaba la buh ban sam 40% ia ki Khasi bad Jaintia, 40% ia ki Garo, bad 20% ia kiwei pat.

Ka HYC ka la pan daka ka jungkhien kaba bniah ia ka jingbuh kyrpang katkum ka kyrdan ba la pan da ka MMSRB na ka bynta ka jingpynrung kam M&HO, ryngkat bad ki kot ki sla kum ki sakhi.

Ka HYC ka pan jingshai ruh hato la pyndonkam ne em ia kino kino ki kyndon ban rah shakhmat ne ban sahdien ha ka jingpyntreikam iaka rukom bhah kam bad kala dawa ruh ban pynsangeh noh ia ka jingpynrung kam haduh ban da pynbeit ia kane.

Ka HYC ka la pynpaw ia ka jingsngewkhia ba ka jingbym iahap ka la pynmih ia ka jingeh kaba khraw hapdeng ki kyrtong Khasi bad Jaintia bad ka la kyntu ia ka tnat ka koit ka khiah ban shim ia ki lad ki lynti ban pynbeit ban pynthikna ia ka jingbud ryntih ia ka Reservation Policy bad ka jinglong hok ha ka rukom thung kam.

“Ngi la kyntu ia ka Sorkar ba kan wanrah ia ka rukom treikam kaba pynsuk ia ka rukom treikam bad kumjuh ruh ban pynsngewthuh ia ki briew ha kano kano ka por ba don ka jingpynrung kam ba katno tylli ki kam, la bhah iaki Khasi-Jaintia bad Garo. U Joram Beda u la ai ia ngi ia ka jingpynshai bad u la pynthikna ruh ia ngi namar ngi la pyntip ia u ba ki don ki kyrtong naka thup Khasi- Jaintia kiba long ba kloi ban shakri ha ki jaka pule Sorkar hynrei namar ka Roster, mynta la pyndap tang 4 ngut watla ki don bun na ki kiba la pyntbit (kumba 100-200 ngut na ki, la ailad tang 4 ngut. Kumta, ngi kwah ba baroh kiba kloi ban shakri ha ki jaka sumar Sorkar kidei ban ioh lad ban shakri. Bun ki samla ki trei hapoh 3F jong ka Sorkar Jylla bad ki kwah ban shah thungkam pura” la ong u president ka HYC u Roykupar Synrem.

“Ngi la kyrpad ruh ba ïa ka jingpynrung kam nangne shakhmat dei ban leh kloi katba lah bad u Joram Beda u la pynthikna ïa ngi ba ka jingpynrung kam kan long ha u bnai Nohprah mynta u snem khnang ba ki kyrtong kiba biang ki dei ban Apply bad yn pynrung ïa ki katkum ka kam ba la mang lane katkum ka Roster ba la pynkhreh da ka tnat” u la ong.