Shillong, Nailur 13: Ka Hynniewtrep Youth Council (HYC) kala dawa ia ka Sorkar Jylla ban pyndam noh shuwa ia ki licence ba shipor bala ai ban buh Casino ha Ri-Bhoi District haba kyntu ruh ba dei ban da iasyllok shuwa ba ki kynhun bapher bapher hashuwa ban pyntreikam ia ka Meghalaya Regulation of Gaming Act, 2021.
“Ngi dawa ia ka Sorkar Jylla ban da iasyllok shuwa bad ki kynhun bapher bapher shuwa ban pyntreikam pura ia ka Act bad ia mynta, pyndam noh ia ki Licence ba shipor bala ai sha kino kino ki briew” ong u Rhembor G Saibon, Vice President ka HYC ha ka kyrwoh ba phah hynne ka sngi ba-ar.
Haba ban jur ia ka jingpyrshah ia ki jingpynlong ain ia ka kam khalai, jingiathong online bad casino ha Jylla, ula ong “Ngi sngew ba kine ki kam kin sa pynjot ia ka jingim jong ki samla bad ka iing ka sem jong ki rangbah bad kynthei kiba lah ban ngop ha kane ka kam khlem da peit khmat ia ki jaidbynriew aiu ki dei lane ka jingngeit jong ki”.
“Lehse ki jingiathong online bad casino ki lah ban wanrah shibun ka khajna ia ka Jylla hynrei ngi kum ka Jylla bad ki paidbah, ngi long ne em kiba kloi ban iapein ia ka lawei jong ki samla bad ka imlang sahlang bad ngi long ne em kiba kloi ban mad ia ki jingtynjuh jong kine ki kam hadien habud” ula bynrap.
Une u Nongialam ka HYC ula ong ba ka Seng ka kyntu ia ka Sorkar Jylla, ia baroh ki MLA bad ki Ophisar ka Sorkar Jylla ba kin shong bishar bad da khmih bha bad sa shim ia ka rai kaba dei “la ka Jylla kala iaid ha ka lynti kaba dei da kaba pyntrei kami a kane ka ain kaba don jingartatien bad ba hap ban iatai”.
Ula buh jingkylli “Kaba kum kaei ka lawei ban gin ieh ia ka pateng ban wan jong ngi? La kane ka rai kan pynpyntoi ne pynduhnong ia kane ka pateng bad mynta bad ka ban dang wan? Hato ngi shu kynthih ha ka jingkmen tang ba ngi la ioh lum khajna kum ka Jylla”.
Haba kdew ia ki jingkren ba dang shen jong u Symbud Myntri Rangbah ka Jylla Bah Prestone Tynsong ba ong b aka Sorkar MDA kala rai ban nym shah shuh ban pyniaid Casino ha Jylla, u Bah Saibon ula ong ba hadien ka jingialang bad ki dkhot ka JACAC na Ri-Bhoi, u Myntri Rangbah ula kular ia ka kynhun b aka Sorkar kan nym pyniaid shuh shakhmat ia ka jingtyrwa ban buh Casino ha ka District lada don ka jingpyrshah na ki paidbah.
Hynrei u ong, wat hapdeng ki jingkular bad ki jingpyrshah na ki kynhun bapher bapher kynthup ki Sengbhalang, ki Khlieh Nongsynshar Shnong, ki Seng Niam bad ki paidbah, ka Sorkar Jylla la I pynban ba kam sngap ia ki jingdawa jong ki nong shongshnong bad jam shakhmat ban pyntreikam ia ka Gambling Act, 2022 da kaba ai ia lai tylli ki licence ba shipor ban buh casino hapoh ka Jylla.
“Kane kala paw na ka jingkren jong u Myntri ba khmih ia ka Tnad Taxation James K Sangma hapoh ka Iingdorbar Thaw Ain haba jubab ia ka call attention motion bala wanrah da u MLA ka Umroi” ula ong.
