Shillong, Nailur 17 : Ka Hill State People’s Democratic Party (HSPDP) ka la pynpaw ba ka don ka jingma ba lah ban pyn thut ia ka suk ka sain lada ka sorkar ka shah ban pynlong ia ka yatra, kaba thmu ban pynbna ia ka masi kum ka kmie jong ka Ri, ha ka 2 tarik u Lber ha nongbah Shillong.
Ha ka shithi sha u Myntri Rangbah ka jylla Conrad K Sangma ha ka sngi Ba-ar, u President HSPDP Youth Wing Korbariang Syiemlieh u la ong, “Da ka jingsngewrit ngi kyntu ia phi ban pyrkhat ba ka lah ban mih ka jingiakynad bad ka jingkulmar ha ka imlang sahlang, ka lah ban don ka jingpynshlur ban iapyrrkhing bad ym khein kor ia ki ain ki kanun nalor ka jingpyniadonbynta jong ka kynhun Gau Rakshah ki long ki jingsngewkhia kiba jur ia ki nongshongshnong ka Jylla kiba pyrshah jur ïa ka thong bad jingthmu jong ka yatra. Ka lah ban mih kaei kaei kaba lah ban pynbitar ia ki nongshongshnong, kaba lah pat ban pynmih ia ki jingjia ki bym sngewtynnad, kiba donkam ia ka jingpyrkhat bniah jong phi”.
“Nga kyrpad rit ba ka Ophis jong ngi kan kyntait ban ai jingbit ban pynlong ia ka Yatra ban pynlong kumba la pynbna da ki nongpyniaid bad ban pynthikna ba kino kino ki yatra ne kino kino ki kam hapoh ka Jylla ki dei kiba la leh da ka jingburom lang ia baroh ki Jaidbynriew ba im ha ka” ula ong.
