Shillong, Nailur 17: Ka HITO West Jaintia Hills ka kyntu ia baroh ki MLA ka Ri-lum Jaintia Hills ba kin pynbor iaka Sorkar Jylla ba kan pynurlong noh ia ka jingkular ban tei iaka Nursing School ha Jowai, ka Nongbah jong ka West Jaintia Hills.
Ia kane la pynpaw da u President ka HITO West Jaintia Hills, samla Owansakhi Paswet hadien ka jingiakynduh iaka Myntri ka tnat ka koit ka khiah Kong Ampareen Lyngdoh.
Haba kren shaki lad pathai khubor u samla Owansakhi u la iathuh ba ha u snem 2012, ka Sorkar Jylla kala mang ban tei iaka Nursing School ha Jowai hynrei mynta la ioh khubor ba ia kane ka Nursing School la pynkynriah noh sha Rilum Garo.
“Wat ap ba haduh ba ngin rah lama iong hakhmat Secretariat, wat ap haduh ba ki Pulit kin bom lathi bad siat bom pynsat khmat, namar ngi don hok ban ioh iaka Nursing School” la ong u samla Owansakhi.
U samla Owansakhi u la ong ba baroh 4 ngut ki MLA khamtam u MLA ka Jowai Constituency Bah Wailadmiki Shylla udei ban bah khlieh lada jia kano kano ka jingjia lada ka seng bad ki paidbah kin iakhih ban pyrshah ia ka jingpynkynriah iaka Nursing School sha Rilum Garo.
