Manipur : Kynthoh u CM ba dei u nongwei bad ki mynder ri ba pynmih ia ki kam umsnam ha Jylla

Imphal, Sept 17: U Myntri Rangbah ka Jylla Manipur N. Biren Singh, u la ong ba “ki briew kiba nabar bad ka kti bar ri” ki dei kiba donkti ha kane ka huri hura kaba mynta hapoh ka jylla.

U Singh u la ong “katba ki don ki briew kiba ngeit ia ka jingong jong u ba “ki briew kiba nabar bad ki nongwei” ki donkti ha ka jingeh kaba mynta ha Manipur, don ki bym ngeit”.

Dang shen ki shipai ka Assam Rifles ki la kem ia uwei u nong Myanmar uba la tip kyrteng kum u Thanglinkap a.k.a Kakap (20), ha ka thain shnong Kachibung jong ka Chandel district ha Manipur, namar ba u la rung be-ain sha ki jaka jong ka India khlem kino kino ki kot ki sla kiba biang.

Utei u briew, uba shong basah ha ki thain Khampat jong ka Myanmar, ula shah kem ha ka taiew ba ladep, katba u dang iaid ha kawei ka khlaw — kaba jngai 3 km hapoh ka jaka jong ka ri India.

U CM da kaba ai khublei ïa ka jingkem ia une u nong Myanmar bad ong ba une u briew uba shah kem u dei u shipai jong ka Kuki National Army (KNA).

“Nga iaroh ia ka Assam Rifles kaba la kem ia u shipai ka KNA,” ong u Singh ha ki lad pathai khubor.

U Myntri Rangbah ka Jylla u la pynthikna biang ba ka ‘thma pyrshah droks’ bad ka jingpynkynriah briew na ki khlaw reserve, ba la sdang da ka sorkar BJP, kam dei kaba la thmu na ka bynta kano kano ka jaitbynriew kaba kyrpang.

Shwa kane, haba kren ha ka jingrakhe jubilee ksiar jong ka All Manipur Working Journalists Union kaba long ha Manipur Press Club, u Biren Singh u la ban jur ïa ka jinglong kaba kynthup lang ïa kine ki kam, haba jubab ïa ki jingkynthoh ba ki ktah khlem jingïahap ïa ki katto katne ki kynhun.

U la kdew ba ha kine ki hynriew snem ba la dep, ki bor pahara kila ioh kurup ia ki droks ba shongdor haduh 60,000 klur tyngka, bad 18,000 hectare ki jaka rep poppy la ioh ban pynjulor.