Shillong, Naitung 19: Ka Kynhun kiengtiar Hynniewtrep National Liberation Council (HNLC) kala dawa ia ka Sorkar Jylla ban sei paidbah noh ia ka kaiphod jing tohkit jong ka Inquiry Commission halor ka jingshah siat iap u General Secretary barim ka seng u Bah Cherishterfield Thangkhiew, kaba jia ha ka 13 tarik Nailar 2021.
Ka HNLC kala buh ia kane ka jingdawa hynne ka sngi ba-ar lyngba u Nongmihkhmat sha ka jingiakren iasuk, uba dei ruh u President ka seng Hynniewtrep National Youth Front (HNLC) Bah Sadon K Blah .
“Ka HNLC ka kwah ban kren da kaba shai ba ka Sorkar ka dei ban pynbna paidbah noh ia ki jingshem jong ka jingtohkit u Justice T Vaiphei ba iadei bad ka jingsiat iap ia u Bah Cherishterfield Thangkhiew” ong u Bah Sadon haba iakren bad ki nongthoh khubor.
Une u Nongialam Sengbalang ula ong ba um iohi satia ia kano kano ka daw ba balei ka Sorkar ka hap ban pynslem ha kaban sei paidbah ia ki jingshem jong kane ka jingtohkit.
“Ka kaiphod kaba bun sla eh kan long kumba 50 sla bad khlem pep kino kino ki samla pule klas XII kin lah ban pule pyndep ia ka 50 sla tang hapoh ka arsngi” ula ong.
U Myntri Rangbah ka Jylla Conrad Kongkal Sangma dang shen ula ong ba ka Sorkar Jylla ka dang shong bishar ia ka kaiphod jingtohkit jong u Justice T vaiphei kaba la aiti sha ka Sorkar naduh ka 20 tarik u Jymmang 2022.
“Ngi la iohpdiang ia ka kaiphod bad ngi dang shong bishar ia ka. Ka dei ka kaiphod kaba jrong bad bun sla bha ym kumba long kiwei kiwei ki kaiphod” ula ong haba kular b aka Sorkar kan sa sei madan ia ka kaiphod ha ka por kaba dei ban sei.
