Shillong Risaw 12: Ka seng Hynñiewtrep Integrated Territorial Organisation (HITO) hynne ka sngi palei kala dawa na ka sorkar jylla ba kadei ban thaw noh ia ka polisi ka ban buh bhah ia ki samla pule ha ki jaka pule bapher bapher lem kumta ka seng kan leit ujor biang sha ka iingkashari.
Ka HITO hapoh ka jingialam u Bah Donbok Dkhar kila aiti da ka dorkhas ha ka Myntri ka Tnad Aiñ ka Kong Ampareen Lyngdoh ha kaba kila dawa ba ka sorkar kadei ban thaw noh iaka polisi ban buh bhah pule ia ki samla ha ki jaka pule sorkar kynthup iaka Higher bad Professional Studies.
U Bah Donbok ula ong kumba long mynta ka jingbhah ia ki samla ban leit pule lyngba ka bhah sorkar ka long kaba beaiñ.
U President ka HITO ula kyntu iaka sorkarkar jylla ba kadei ban mynjur shwa da ka aiñrew (Ordinance) khnang ba ki samla pule ka jylla kinym shah ialam bakla bad ha shwa ban sdang ki jingpule ha u snem ban wan, ki Head jongki Department kidei ban don iaka Reservation Policy kabashai kdar ha kaba iadei bad ka Admission ha ki jaka pule jong ka sorkar kynthup iaka Higher bad Professional Studies.
Ula iathuh ba na ka liang jong ka myntri sorkar kala pynpaw ha khmat jong ka sneg ba kan sa rah ia katei ban pynsngew sha u Myntri Rangbah ka jylla.
U Bah Donbok ula ong, ba ka seng kala pan ia ka jingpynshai na ka sorkar jylla halor katei ka mat hynrei namar ka jingpulom jong ka sorkar kila leit ban ujor sha ka iingkashari.
“Lyngba ka jingtuklar jong ka High Court ba ka sorkar jylla lyngba katnad Aiñ kala ong ba ka jingbhah kyrpang haka pule puthi kaba kynthup ia ka Higher bad Professional Courses la pyntreikam katkum ka nongrim jongka State Job Reservation Policy,” ong u Bah Donbok.
Ha kawei pat ka liang ka HITO kala pan jingpynshai ruh na ka Kong Ampareen Lyngdoh ha kaba iadei bad ka jingpynsangeh noh iaka jingpynbna iaka Result jongka Mid Level Health Provider ha ka kontrak ban shakri ha ki Health and Wellnes Centre Sub Centres ha ka jylla lyngba ka NHM kaba la pynmih haka 23.8.2023 bad kila buh jingkylli lano ka sorkar jylla kan pynmih ia ka Result kaba thymmai kaban kynthup lang ia ki jaidbynriew Garo.
