Shillong, Risaw 12: Ka Nongaiktien ka sorkar jylla kong Ampareen Lyngdoh hynne ka sngi Palei, kala pynthikna ba ym shym la don satia ki nong Meghalaya kiba mynsaw na ka jingkylla ka rel North East Express ha Boxar District ka Bihar, kaba jia hynnin ka miet sngi Balang.
Ka Myntri ka pyntip ba ka tnad Railway ka Sorkar Pdeng kala ai ktien sha ka Sorkar Jylla ba ym shym don satia ki nong Meghalaya kiba mynsaw ha kane ka jingjia.
Ka Myntri ka iathuh baka sorkar jylla kala iakren ba ki ophsiar ka tnat Railway ka sorkar pdeng ban lum jingtip ba kham bniah halor kane ka jingkylla ka Rel.
“Haduh mynta ki ophisar ka tnat Railway ka sorkar pdeng kila pyntip ba ym don satia ba mynsaw ki briew napoh Meghalaya hynrei lada don mano mano kiba dang sngew artatien kila lah ban pyntip shaka Twitter u Myntri Rangbah jylla Conrad K Sangma bad ki lah ban phong sha u Number Helpline 18003453644” ong ka kong Ampareen.
Ka kong Ampareen kala iathuh ba ka sorkar jylla kala bthah iaki ophisar ka tnat Transport bad iaki nongpyniaid iaka Meghalaya House kaba don ha Guwahati Assam ban ai jingiarap iaki nong Meghalaya kiba donkam jingiarap haba iadei bad ka jingkylla ka Rel North.
“Nga kyrmen ban nym don satia ki nong Meghalaya kiba mynsaw na kane ka jingkylla ka Rel hynrei watla kata ka sorkar jylla ka dang lum shuh shuh ki jingtip naka tnat Railway ka sorkar pdeng” kala ong.
