Shillong, Risaw 12 : Ka North Eastern Council (NEC) kala bthah ia ki samla wad kam halor ka jingmih ka jingpynbna thok (false advertisement) ba ka NEC kan bei pisa ha ka jingthungkam nos bad nongsumar ki ban leit trei sha Japan.
Ha ka jingbthah bala pynmih hynne ka sngi Palei, u Nongaiktien ka NEC ula ong ba ka jingpynbna kaba mih ha ki social media bad katto katne ki lad pathai khubor ha ka taiew bala leit noh, ki don ia ki jingtip kiba shu thok.
“Ki briew kiba kwah bad ba lah ban trei ia kine ki kam (eligible) ki dei ban husiar bha bad ban da pynshisah ia ki jingpynbna thungkam kiba mih ha ki social media bad ki katto katne ki kot khubor khnang ba kin nym iakynduh jingeh namar ka NEC kam ju bei pisa ia kum kine ki jingthungkam ne ai ram leit pyntbit ia ki sap” maham u nongaiktien.
Ula ong ba kane ka jingpynbna kala kam ba ka NEC kab bei pisa ia 300 ngut ki briew ban thungkam nos bad nongsumar ha Japan bad pynbna ruh ba kan ai ia ki skill loan ha ka hotel industry.
