Shillong, Naiwieng 26: Ka seng Hynniewtrep Integrated Territorial Organization (HITO) kala dawa ia ka Sorkar Jylla ba kan ai jingiarap ia ki lanot ba iap bad ka mynsaw na ka jingjia Mukroh, da ka song pisa ba T. 2.5 klur bala mang na ka bynta ban pynlong ia ka tamasa Cherry Blossom ha Shillong
Kane ka jingdawa kala mih na u President ka HITO bah Donbok Dkhar haba kren ha ka por pynlong ka jingthang mombati ha phyllaw ka State Central Library Shillong kum shi bynta ban kynmaw burom iaki lanot.
Haba kren sha ki lad pathai khubor u bah Donbok u la ong ba ka T.5 lak ba ka sorkar ka la sam sha ki 5 tylli ki longïng ba khlad na ka jingshah ther kuli ha ki pulit Assam kam dap satia namar kine ki ba duh iala ki mynsiem kidei kiba pyndap ha ïng ha sem.
“Kane ka song pisa ba T.5 lak ban iarap iaki longïng ba shem lanot kam iahap satia namar lada ka sorkar jylla ka lah ban pynlut kumba T. 2.5 klur, T. 14 klur ne T. 5 klur naka bynta ki tamasa bapher bapher, kam don jingeh iaka sorkar ban iarap khambun iaki para doh para snam ba shem lanot ha ka jingshah thombor ha ki pulit Assam” la ong ba bah Donbok.
U bah Donbok u la ong ba ka seng ka sngew ba ka sorkar jylla kadei ban pyndonkam ka song pisa ba T. 2.5 klur naka bynta ban ai jingiarap iaki paidbah ba shah ktah ha ka jingther kuli ki pulit Assam.
U la ong ba ka rai jong ka sorkar ban pynsangeh noh iaki tamasa kynthup iaka Cherry Blossom ka long kaba biang hynrei ka sorkar ruh kadei ban pyndonkam ia kane ka song pisa bala mang naka bynta ka Cherry Blossom ban iarap iaki paidbah ba shem lanot lada kadei ka sorkar ba shim jingkitkhlieh halor ka jingjia ha Mukroh West Jaintia Hills.
Naka liang u General Secretary ka HITO Wanbun Dkhar u la kynnoh ba ka jingiakjia pud hapdeng ka Meghalaya bad Assam kadei ka jingleh politiks da ki sengsain pyrthei bad naka liang ka seng HITO ka phah ka kyrwoh sha ka sorkar Meghalaya ba kam dei ban ialeh khun jakai iaka iap ka im ki para doh para snam kiba sah ha ki thain khappud.
U bah Wanhun u la ong ba ka jylla kala dap 50 snem hynrei namar ka jingjur palat ka jingle politiks haduh mynta ka jylla kam pat don satia iala u pud u sam ba biang bad dei namar kane ka sorkar synroplang ka Meghalaya Democratic Alliance (MDA) ha ka jingialam ka National People’s Party (NPP) kadei ban shim khia mardor ban pynbeit noh ia u pud u sam ka jylla.
“Ka HITO ka phah ka kyrwoh sha ka sorkar MDA ba ialam da ka NPP, ba lada phi dang ialaeh khun jakai iaka iap ka im ki para doh para snam kiba sah ha ki thain khappud, phim don hok ban long nongialam ne phim don hok ban long nongmihkhmat ruh” la ong u bah Wanbun.
