Shillong, Iaiong 07: Ka Hynniewtrep Border Dispute Redressal Forum (HBDRF) hynne ka sngi Palei kala kyntu ia u Chief Electoral Officer (CEO) ka Jylla Bah FR Kharkongor ban pynrung lang noh ia ki Nongshongshnong jong ki 43 tylli ki Shnong ka Block-I hapoh ka Electoral Roll jong ka Jylla.
Hadien ka jingiakynduh, u Nongaiktien ka HBDRF Bah Thomas Passah ula iathuh ba ka jingpynrung ia kine ki 43 tylli ki Shnong kan pynthikna ba ki Nongshongshnong ha kine ki Shnong kin ioh noh ia ka EPIC n aka Shnong ba ki sah.
Ula ong ba kumba iaid mynta, ki paidbah kiba sah ha ki jaka khappud ba iakajia ki don ia ki EPIC ym na ki shnong ba ki sah hynrei na ki Shnong kiba hap kiba hap hapoh ka Jylla Meghalaya ki bym don satia ha ka jingiakajia.
“Namar kata, kane ka lah ban wanrah ia ka kynrum kynram ha kaban pynbeit ia ka jingiakajia pud. Ta ka daw ngi la kyrpad ia u CEM ban khmih ia kane ka kam. Hynrei, na ka Ophis u CEO la kren shai ba tang ki briew ki lah ban pynrung kyrteng ha ka electoral roll da kaba pyndap ia ka form-6” ong u Bah Thomas.
Namar kane, ula pyntip b aka Forum kala rai ban leit phai biang sha kine ki shnong bad ban pynsngewthuh ia ki paidbah halor ka jingdonkam ban pyndap ia ki Form-6 bad ban pynpaw ruh ia ka shnong ba ki sah ha ka jaka ka shnong ka bym dei hok.
“Ai ba kan iaid kat kum ka lynti ban pynrung kyrteng bad ngin sa peit ia ka sienjam ba dei ban shim la ka Ophis u CEO ka pdiang ne kyntait ia ka jingtywa thep kyrteng” ula bynrap.
U Bah Passah ula ong ba ka jingthmu jong ka Forum ban rah iakren ia kane ka kam ka long eh na ka bynta ban pynthikna ba ki briew kin nym duh ei ia ki jaka ki puta kiba hap sha ka Jylla Meghalaya.
“Namar lada kine ki nongshongshnong ha kine ki jaka kyndong ki don ia ki sakhi ba ki dei ki nongshongshnong jong kine ki shnong kiba hap sha Meghalaya, ka lad ka don ba ngi lah ban duh noh ia kine ki shnong bad ki lah ban hap ei sha Assam” ula ong.
Haba pynpaw ba ka Sorkar ka ju pynthikna ba ki kor EVM ki poi sha manla ki shnong ba sha kyndong eh jong ka Ri, u Bah Passah ula ong “Ngi donkam ban kylli jingkylli ba balei kine ki shnong ha khappud kim ioh ia ki jingdonkam ba manla ka sngi kum ki lad ai jingsumar, ki skul, ki surok bad kiwei kiwei”.
“Ngi kyrmen ba ynda ngi iakynduh biang ia ki briew jong kine ki Shnong naba ngin sa iashong jingialang shen, ngin sap hah ia ka khubor ba ki dei ban pynrung kyrteng ialade ha ka electoral rol jong ka Jylla Meghalaya bad ngin sa peit nangne naba kila pynpaw ia ka jingkwah ba kin don kyrteng ha Jylla Meghalaya” ula bynrap.
