Nongstoin, Nailur 13: Ka seng Federation of Khasi Jaintia & Garo People (FKJGP)-West Khasi Hills kala dawa ia u Deputy Commissioner ka District ban tuklar halor ka jingwan pynsmiej jong ki Nongmihkhmat ka Assam ha Langpih bad jingpynbor ia ki paid nongshongshnong ban pyrshah ia ka jingthmu pynhap ia ki shnong ba iakajia sha ka Jylla Meghalaya.
Ka FKJGP kala leit ai da ka dorkhas ha u Deputy Commissioner Bah Garod LSN Dykes hynne ka sngi ba-ar ba dawa ba un iakren mardor ruh bad ki bor Sorkar ka Jylla ba kin nym ailad ia ki briew na Assam ban wan mushlia ia ki kam pynbeit pud hapoh ka Langpih Sector.
Kane ka jingdawa ka FKJGP kala mih halor ka jinghiar jurip pud jong ki Dkhot ka Liang Pyrshah ka Assam kiba dei ki MLA ka Congress bala ialam da ka Nandita Das, MLA ka Boko nalor kiwei kiwei ki MLA kane ka Party, kaba la jia ha ka 10 tarik mynta u bnai.
Kane ka kynhun ki MLA ka Congress na Assam kila pynlong ruh ia ka jingialang paidbah ha Langpih ban pynbor ia ki paid Nepali bad katto katne ki Garo bad Khasi ba kin nym treh ban leit phai sha Meghalaya ha ka jingiapyn beit pud jong ka wat ba –ar hapdeng ka Meghalaya bad ka Assam.
U Bah Carry Oscar Kharmuti, General Secretary ka FKJGP-WKH, haba iakren bad ki lad pathai khubor hadien ba iakynduh ia u Deputy Commissioner, ula ong ba kane ka jingwan jurip jong ki MLA ka Congress ha Langpih ka pyni shai ba ka Sorkar Assam kam burom satia ia ka jingiateh hapdeng u Myntri Rangbah ka Assam Himanta Biswa Sarma bad u Myntri Rangbah ka Jylla Conrad Kongkal Sangma, ha ka jingiakynduh ba long myn ha ka 16 tarik Naiwieng 2021 ha Langpih.
“Kane ka pyni ruh ba kine ki MLA ka Congress kim burom ia ka status quo kiba la iateh da ki ar sorkar” ula ong haba pyntip ba na ka liang jong u Deputy Commissioner ula iathuh ba um shym la ioh jingtip satia ia katei ka jingwan ki Nongmihkhmat ka Assam ha Langpih.
Une u Nongialam ka FKJGP ula iathuh ba u Deputy Commissioner ula kular ba un sa phah ia ka dorkhas jong ka seng sha ka Regional Committee on Border Dispute ka West Khasi Hills nalor kiwei kiwei ki jingthoh kiba wan na ki Dorbar Shnong bad kumjuh ruh ki riew shimet.
“Ka jingwan mushlia jong ki Heh ka Sorkar Assam na ka por sha ka por ka pynshrai bad pyningkhong ia ka Seng. Ka jingbitar ka long eh ba kine ki MLA kila kren shai ba kin ym shah wat tang shi inchi ka jaka ha Langpih kan leit sha Meghalaya, kaba mut ba kila kam trai naduh Kampahduli haduh Mawsikar” ula ong.
Ka FKJGP kala dawa ia ka Sorkar Jylla ba kam dei ban shu sngap ia kane ka jingwan mushlia ki bor ka Assam lem kumta ka Seng kan hap ban shim iala ki jong ki lynti ban iada iala u jong u pud u sam bad ki paradoh parasnam kiba sah ha ka thain Langpih.
