Shillong, Jylliew 09: Ka Federation of Khasi Jaiñtia and Garo People (FKJGP) kala dawa ia ka Sorkar ban pyntreikam noh mardor ia ka Principal Act Jong ka MRSSA 2016 haba kynthoh ba ka Sorkar ka dei ban shim ia ka jingjia jong ki shikurim na Indore, kum u diengsympat.
Kane ka jingdawa jong ka FKJGP kala mih na ka jingjia ba jia ia ki ar ngut shi kurim kila jah klep ha Sohra bad ka jingioh tam ia ka metiap u kurim, Raja Raghuvanshi katba hadien 7 sngi la ioh pat ban kem ia ka Kurim, ka Sonam Raghuvanshi kaba la wan pyndem dalade ha Uttar Pradesh hadien ka jingshah kem ki 4 ngut ki runar kiba donkti ban pyniap ia u Raja.
U President ka FKJGP u Bah Dundee Cliff Khongsit ha ka kyrwoh khubor ula ong “Ka sorkar jylla kadei ban shim ia kane ka jingjia kum u diengsympat bad ka dawa ba katba ka jylla ka dang ap ia ka jingbit na ka Sorkar Kmie ban pyntreikam ia ka ILP (Inner line Permit) ne ka Bengal Eastern Frontier Regulation Act 1873) dei ban pyntreikam noh mardor shwa ia ka Principal Act jong ka MRSSA 2016 kaba la don lypa iaki kyndon ban wanrah ia ka jingshngaiñ ym tang ia ki trai ri trai muluk hynrei wat ia ki briew ba wan nabar”.
“Ka MRSSA ka pynthikna ia ka jingshngain ia baroh kiba wan da ka lynti kaba dei la ka long ia ki nongwan jngohkai pyrthei, kiba wan bylla, kiba wan pule bad kumjuh ruh kiba wan ban trei ia ki kam ha ki tnad bapher bapher jong ka Sorkar Jylla, Sorkar Pdeng, ki kompani, wat ha ki Bank” ula ong.
Une u Nongialam ka FKJGO ula ong “Bunsien ia ki kam sniew kam lute kiba jia bunsien kidei kiba leh da ki riew bymman kiba nabar jylla namar haduh mynta ngi kum ka jylla ngim pat don ki ain kiba paka ban iada ne tehlakam ia kum kine ki kam sniew ha ka jylla ka jong ngi”.
Ka FKJGP ka kyntu jur ruh ia baroh ki seng saiñpyrthei ba kin ieng tylli kawei ban wanrah ia ki aiñ kiban ai ka jingiada bad ka jingshngaiñ ym tang ia ki trai ri trai muluk da kaba klet noh shipor ia ka jingkwah burom, jingsngew pher saiñhima bad kumta ter ter, hynrei ban saiñdur ia ka jylla hi baroh kawei nangne shakhmat.
Nalor kane ka FKJGP kala pyrshang ban bishar bniah iaki jinglong jingman bad ki jingshah kynthoh kiba bun lyngba ki National News, rynsan Social media bapher bapher bad khamtam eh na ki bahaing hasem jong ki shijur na Indore, Madhya Pradesh halor ka jingiap jong u Raja Raghuvanshi bad ka jingjah rngai jong ka Sonam Raghuvanshi ha kine ki khyndiat taiew bala dep.
“Kum ka seng kam banse ban mih shakhmat ban pynpaw ia ka jingsngew khia kaba khraw ia ki jingshah pharep ki bym shong nongrim jong ki trai ri trai muluk, kiba lah ruh ban ktah iaka shongsuk shongshngain bad ka jingsngew syier bad jynjar jingmut jong ki para ri kiba shong basah sha kiwei pat ki jylla bapher bapher jong ri India” ula ong.
Ka FKJGP ka ai khublei kyrpang iaka Sorkar Jylla khamtam ia ka Tnad Pulit kaba la shimkhia ban tih tynrai ia ka dawbah jong ka jingiap u Raja Raghuvanshi tad haduh ban da ioh ban kem ia ka kurim Sonam Raghuvanshi lem bad ia kiwei pat kiba donkti ka katei ka kam bymman.
