Shillong Naitung 09: Ka All Khasi Meghalaya Tourist Taxi Association (AKMTTA) hynne ka sngi Baar kala leit aiti iaka dorkhas ha u Myntri ka tnad jngohkai Bah Paul Lyngdoh, ba dawa ba ym dei shuh ban shah ia ki kali kiba nabar ka jylla ban kamai ha ki jaka jngohkai kiba don ha ka jylla.
“Ka AKMTTA da kawei ka sur kala shim ia ka rai ha ka 1 tarik u Naitung ban kyrpad ia ka sorkar jylla ba kan pynmih ia ka jingpynbna ka ban khang ia baroh ki kali kiba nabar ka jylla ba kin kit ia ki paidbah na Shillong sha ki jaka jngohkai kiba don ha kylleng ka jylla” pynpaw ka AKMTTA ha ka dorkhas.
Ha katei ka dorkhas ka AKMTTA kala pyni ruh ia ka jinglong jingman katkum ka jingwad bniah kaba la leh da ka seng bad kala pynpaw ba na ki 5120 tylli ki kali kiba la rejistar ha Meghalaya, ki don kumba 4014 tylli kiba kamai, kim shym la ioh iaki nongshong kali (Passenger) man la sngi bad kila mad iaka jingduhnong kaba khraw.
Kila pynpaw ba katei ka jingduhnong ka dei namar ba ki kali kamai kiba nabar ka jylla kila wan ban kamai shaduh sha ki jaka jngohkai wat hadien ba kila wan buh ia ki briew kiba na shabar jong ka jylla.
Ka AKMTTA kala pynpaw ba kila don haduh 3543 tylli ki kali kamai kiba wan kit ia ki nongjngohkai sha ka jylla man la ka sngi bad 2437 tylli na kitei kidei kiba wan na shabar ka jylla. Katei ka jingwad jingtip bniah kadei kaba la leh da ka AKMTTA katkum ka jingkdew jongu Director ka tnad Tourism, la pynpaw ha ka dorkhas.
Ka seng ki nongniah kali kala banjur ba ia ki kali Tourist Taxi kiba nabar ka jylla ki lah ban wan kit ia ki nongleit nongwan sha ka jylla, hynrei kim dei pat ban iohlad ban leit kit ia kitei ki nongleit nongwan sha kylleng ki jaka jngohkai.
“Ki kali kiba rejistar shabar jongka jylla ki lah ban wan ialam ia ki briew sha ka jylla jong ngi,hynrei kadei pat ka hok bad ka kamram ka jong ngi kum ki nongkamai ia ki Tourist Taxi ban ialam ia ki sha ki jaka jngohkai” la pynpaw ka AKMTTA.
“Ngi kyrpad jur iaka sorkar ba kan tehlakam ia kane ka bynta da kaba leh eiei noh mardor” la pynkut ka AKMTTA.
