Shillong, Naiwieng 09: Ka North East Students Organisation (NESO) hynne ka sngi Palei, kala dawa naka sorkar pdeng ba kadei ban shim ia ki lad ki lynti ban wanrah noh iaka jingsuk kaba shi rta hapoh ka jylla Manipur kaba don hapdeng ka jingiaumsnam haduh mynta.
U Chairman ka NESO Bah Samuel B Jyrwa haba kren ha ka jingiakhih shong kyllain mungor ha u Mot sahnam jong u Tirot Sing Syiem ha Laitumkhrah, ula ong ba ka sorkar pdeng kadei ban khot iakren noh ia baroh kiba don bynta na ka bynta ban iatreilang ban wanrah iaka jingsuk.
Nalor kane ula kynthoh ruh ia ka sorkar pdeng ba ki paidbah kila mad ia ka jingleh bym hok ha ka synshar khaddar.
“Ngi lah kren ia kane man la ka por bad pateng la pateng, ba ka sorkar India kala leh bym hok ha ka synshar khaddar hynrei ka sorkar pdeng kala kyntait ba kala leh bym hok ha ka synshar khaddar” ong u Bah Samuel Jyrwa.
Ula ong ba ka jingjia ha Manipur ka long kaba sngewsih bad ka NESO ka sngew ba ka sorkar India kala pulom khait ha kaban shimkhia ia kane ka jingjia hapoh ka jylla Manipur.
“Ngi lah kyrpad iaka sorkar India ba kna pynbiet noh ia katei ka jingjia, hynrei haduh mynta ka i pynban ba ka sorkar India ka leh kumba matlah bad kyllut ia ka jingmad jingeh jong ki paidbah ka jylla Manipur. Haduh katno kane kan dang iai bteng ? Haduh katno ngin dang ailad ia katei ka jngjia ba kan dang iai bteng?” la buh jingkylli u Chairman ka NESO.
Katba u President ka KSU u samla Lambokstarwell Marngar ula ong, ba halor ka jingjia ha Manipur, na ka liang ka NESO kala pynlong ia ki jingiakhih bapher bapher hapoh ka jingialam u bah Samuel Jyrwa bad la leit ruh ban hiar sha Manipur khamtam sha ki jaka kiba la shem lanot na ka jingiaumsnam.
“Ngi ieng ha kane ka jaka ban pynrem ia ka jingsngap jar jong ka sorkar India ia ka jingjia hapoh jylla Manipur bad kane ka jingsngap jar kala nang ai mynsiem ban nang jur ka jingiaumsnam. La 6 bnai ka jingpyniap kala iaid shakhmat naduh ki khunlung khynnah hynrei ka sorkar India ka don eiei, ia ka buit kaba na sha lyndet” ong u Lambokstarwell.
Ula ong ba ka sorkar ka pyni kumba kam khein ia ka thain shatei lammihngi kum ki jylla kiba don hapoh ka ri India bad kane ka pawshai na ki kam jong ka sorkar India bad ka KSU ka dawa na ka sorkar India ba kadei ban leh eiei ia ka jingiaumsnam ha Manipur da kaba khot iakren ia baroh arliang ki jaidbynriew.
“Lada ka sorkar kam leh eiei, ka pyni ba don eiei sha lyndet bad dei hi ka sorkar kaba aiding bad kaba pynmih ia ka jingiaumsnam ha Manipur. Ka sorkar India kadei ban shim ia ka jingkitkhlieh ia ka jingiaumsnam ha Manipur” ong u President ka KSU.
Katba u Chongtham Thangamba Meetei, President jongka Shilllong Manipuri Students’ Union ula ong ba ula sngewsih kthang bad pait dohnud ia kaei kaba la jia hapoh ka jylla Manipur bad kane ka jingsngewsih ka long ruh ia baroh ki paidbah ha ka thain shatei lammihngi bad ula kyntu ia baroh ki jaidbynriew ba kin iatreilang bad ialeh ban pynkut noh ia katei ka kam iaumsnam da ka jingiatreilang.
 hynne ka sngi Palei, kala pynlong ia ka jingiakhih da kaba shong kyllain mungor ha baroh ki Jylla jong ka thain Shatei Lam Mihngi.){kind=link}