Nongpoh, Naiwieng 09 : Ka HITO Ri-Bhoi District, kala ujor sha ki bor District ka Ri-Bhoi halor ka jingdon ki kynhun kiba lum khajna be-ain haduh T. 30 hajar na kawei ka kali kit syiar ba wan shapoh ka Jylla kynthup ki Pulit.
Ia kane ka jingujor la mudui da u Working President ka HITO-Umsning Circle samla Banpynshai Umbah bad u Secretary samla Wanpynsuk Lyngdoh ha u Deputy Commissioner ka Ri-Bhoi District hynne ka sngi Palei.
La kynnoh ba kine ki kynhun bad Pulit kila lum khajna ia ki kali kit syiar ha ka thain Byrnihat, kiba la lum ha ka kyrteng jong ki Association Livestock bapher bapher.
Haba iakren bad ki nongthoh khubor, u samla Banpynshai ula iathuh ba ka HITO Umsning kala ioh pdiang ia bun ki jingujpr na kiba bun ki nongkhaii bad nongdie syiar ba ka don ka jinglum khajna beain ia ki kali kit syiar da ki riew shimkabu.
U iathuh ba ka khajna ba kine ki kynhun ki lum ka kot haduh T. 30 hajar kawei ka kali, kaba la ktah shibun ia ki nongkhaii.
Ula pynpaw ruh ia ka jinglyngngoh ban tip ba kitei ki briew ba leh ia kane ka kam, kim dei satia jong ka Tnad Animal Husbandry & Veterinary.
Kane ka Seng kala dawa ia u Deputy Commissioner ba un tuklar mardor ia kane ka kam bad ban leh eiei pyrshah ia kine ki kynhun ba lum pisa be-ain.
