Shillong, Jymmang 13 : Ka Meghalaya ka dei kawei na ki katto katne ki Jylla kiba dang sah shadien haba phai sha ka jingpyntreikam ia ki smart meter.
Kat kum ka jingong u Myntri ka tnad Bording AT Mondal, ka daw ba hakhmat eh ka dei namar ba katto katne ki kompani-kiba la iashimbynta ha ka jingiathep tender-la shem ba ki dei kiba la don dak iong sha kiwei pat ki jaka.
“Ngi la slem wat ban shim rai ia ki tender namar ki katto katne ki kompani kiba la don dak iong sha kiwei pat ki jaka bad dang shen nga la pynsngew ia kane ka kam hakhmat u Myntri ka Ministry of Power” ula iathuh haba iakren bad ki nongthoh khubor.
“U (Myntri ka Sorkar Pdeng) la kular bad bthah ba nangne shakhmat, baroh ki kompani bala don dak iong yn sa pyni noh da ki portal bala shna kyrpang ia kane ka kam khnang bah aba don ka jingiathep tender, ngi lah ban peit na ka portal la ki dei ki kompani bala don dak iong ne em” ula bynrap.
U Myntri ula kular ruh ba ka Sorkar kan shim ia ka jingshaniah jong baroh ki nongthang bording ha kaban pyntreikam ryntih ia ki smart meter hapoh ka Jylla.
Haba kylli, u Mondal ula ong “Hooid, haba phi pyntreikam da ki kor thymmai, ka jingsngew artatien kan don beit. Kam dei tang ia ki smart meter. Baroh ki Jylla kila jam shakhmat ban pyntreikam iaki smart meter. Ki don bun ki jingujor bad khatduh iakine ki kam la dep ban pynbeit bad la pyntreikam ia ki smart meter. Ngi dei kawei na ki Jylla, kiba dang sah shadien haba phai sha ka jingpyntreikam ia ki smart meter”.
