Shillong, Jymmang 13 : U Myntri ka Tnad Bording AT Mondal ha ka sngi Ba-ar ula ong ba ka Sorkar kala pynkhreh ban wanrah ia ka plan kaba janai bha na ka bynta u snem 2035 ban pynthikna ia ka jingkhlain bad jingjanai ha ka kam pynmih bording ha Jylla.
Haba kren sha ki nongthoh khubor, u Mondal ula ong “Kumba ka long ka jingpynmih bording ha Jylla, ngi la nang kiew suki suki watla ka jingkiew jong ngi ka kham iapher haba nujor bad kiwei ki Jylla. Ngi la pynkhreh ia ka plan kaba bniah bha na ka bynta u 2035 bad ynda ngi por ha u 2035, ngin sa iohi kumno ka jingpynmih bording ka Jylla ka long”.
U Mondal u pyntip ba ka Sorkar Jylla ka ju iakren man ka por bad ka Ministry of Power bad ong “Ngi la pynsngew ia kiba bun ki kam kiba lah ban iarap da ka Ministry. Baroh kine ki kam kila iaid bad ngi pynkhreh ia ka plan ban kyntiew kyrdan haba phai sha ka jingpynmih bording, ka jingdon nongtrei bad baroh kiwei kiwei kynthup ka jingkyntiew ia ki rukom treikam hashuwa ba ngin poi u 2035.”
Haba kylli, u Myntri ula ong “Ngi donkam ban kyntiew kyrdan ia ki kor ki bor jong ngi, Hadien ba dep ka RDSS, ngin sa poi ha ka kyrdan kaba biang bha namar ki kam kila sdang bad kila nang iaid. Kaba ar ka long ba kan pynduna ia ki jingduhnong jong ngi lyngba ka RDSS bad ka don ruh ka jingpyndait ia ki smart meter kiban sa nang pynduna ia ki jingduhnong bad kyntiew ia ka jingpynmih pisa. Ngi la phaikhmat mynta sha ka transmission bad generation”.
Ha kajuh ka por,u Myntri ula pyntip ba ka lyiur kala wan bad ka Jylla kan don ha u pud ubym don jing khuslai shuh haba phai sha ka jingsam bording.
