Dang pynthikna ka Sorkar ia ki briew ba shna iing beain ha Lum Survey : Prestone

Ka Sorkar kan nym ai jaka riehtngen ia kiba sah beain

Shillong, Jymmang 27 : Haba ieng skhem ha ka nongrim ba ka Sorkar kan nym ai jaka riehtngen ia ki briew ba shna iing beain, u Symbud Myntri Rangbah ba khmih ia ka Tnad kam Pohiing (Police) Bah Prestone Tynsong ula ong ba ki kam kila iaid shakhmat ban pynthikna ki dei ki briew ba kumno kiba sah ha Lum Survey bad ka ain kan sa leh hi ia kaba donkam lada lap ba ki dei kiba shong beain.

Haba iakren bad ki nongthoh khubor, u Bah Prestone ula ong “Ka ain ka don. Ka jingteh kyndon ka don. Ngi ruh ngim kyr shan ban ai jaka rieh ia ki. Lada ki dei kiba shong beain, ka ain hi kan shim la ka jong ka lynti”.

Haba pynpaw ba ka Sorkar kam shym la iohthiah lyngngai halor kane ka ishu, u Symbud Myntri Rangbah ula ong “Ngi kwah ban leh eiei bad ngi kwah ban pynthokna la kine ki briew (ba sah ha Lum Survey) ki dei na India lane ki lah ban nym dei…ngim pat lah ban ong eiei ia kata namar ka jingpynthikna ka dang iaid shakhmat”.

“Hynrei, toh ngi ia peit lashai ka jingshong bishar (halor kane ka kam) kan don bad hadien kata phin sa iohi ia kiei ki sienjam ki ban sa shim ym tang da ka Sorkar Jylla hynrei ka Sorkar Pdeng ruh hapoh ka jingialam u Defence Estate Officer” ula bynrap.

U Bah Prestone ula pyntip ruh ba ula bthah ia u Deputy Commissioner ka East Khasi Hills SC Sadhu ba un khot biang ia ka jingialang jong baroh ki kynhun namar kane ka jaka ka dei jong ka Defence Estate Office, Guwahati bad hap hapoh ka jaka jong ka Contonment Board.

Haba kdew halor ka jingleit pynpra Iing ka HYC, u Symbud Myntri Rangbah ula ong ba ka HYC kala pynlong ia ka jingleit pynpra ia ki Iing khlem da iasyllok bad ki bor District kaba lam sha ka jingpynkhein ia ki ain.

Haba kylli halor ka jingkem ka HYC ia ki nongkhaii bad nongdih droks, u Bah Prestone ula pyntip ba ula bthah ia u Deputy Commissioner ban khot ia ka jingialang halor kane ruh ka kam.