Shillong, Lber 23 : U Myntri Rangbah ka Jylla Conrad K Sangma hynne ka sngi Palei, ula pyntip ha Iingdorbar Thaw Ain baka Sorkar ka dang iakren bad ka Airport Authority of India (AAI) lem bad kiwei ki Agency ban pyniar ia ka runway (lynti hiar bad pynher ia ka liengsuin) ba mynta jong ka Umroi Airport khnang ban lah hiar ki liengsuin kiba kham heh.
“Kane kan plie lynti ia ka jingpyniasoh liengsuin sah ki sorbah kum ka Mumbai, Bengaluru, Hyderabad bad Chennai ,bad ka jingkyntiew ia ka jingwan ki nongshangkai” ong u Conrad ha ka jingkren halor ka mang tyngka.
Ka Umroi Airport ka dei kaba la treikam pura ha u snem 2018 bad mynta ka don ia ki liengsuin ba pyniasoh sha ki 9 tylli ki sorbah kynthup ka Kolkata bad Delhi.
Haduh T. 15.5 klur la mang pisa ha ka mang tyngka ban pynjanai ia ka jingpyniasoh liengsuin hapoh ka Jylla, ong u Conrad.
Kat kum ka jingong jong u Myntri Rangbah, ka jingpynjanai ia ka jingpyniasoh da ka liangsuin kan dei kawei na ki kam ba khraw eh ha kaban kyntiew ia ka ioh ka kot jong ka Meghalaya.
Haba kylli ha ka por ba iakren bad ki nongthoh khubor, u Conrad ula ong ba ka Sorkar kam don jingthmu ban jam sha ka kad liengsuin ba thymmai.
Ha kajuh ka por, u Myntri Rangbah ula pynbna ka Baljek Airport kan sa treikam noh shen da ki liengsion ba pyniasoh beit beit hapdeng ka Shillong bad Tura. Ka sorkar kan sa tei ruh ia ki heliport ha Shillong bad Tura ban pynkhlain ia ka jingpyn iasoh na suin.
