Shillong, Rymphang 28: Haduh khatlai na ki laiphew-phra tylli ki skul Eklavya Model Residential Schools (EMRS) ki dang iaid ha ka jingpyntrei hapoh ka Jylla.
Ka skul EMRS ha Pahamsyiem ka dei kaba la dep bad ka skul EMRS ha Samanda ruh kan sa dep noh shen, ong u Lat ka Jylla CH Vijayashankar haba ai jingkren ha ka sngi sdang ia ka Dorbar Mang tyngka.
U pyntip ruh ba haduh 16 tylli ki Detailed Project Report (DPR) jong ki skul EMRS la dei ban ai jingmynjur ban khot tender noh bad ia kiba sah sa 7 tylli ki EMRS, ka jingwad jaka ka dang iaid shakhmat.
U Lat ka Jylla ula pyntip ruh ba ka Sorkar Jylla kala kyntiew kyrdan ia ki jingtei jong palat 2000 tylli ki skulhapoh ka Mission Education.
Haba pynpaw ba ka Meghalaya kala wan hakhmat bha ha ka jingpyntreikam ia ka NEP 2020, u Lat ula ong ba ka jingsam ia ka Meghalaya Futur Ready TLM Kit (JaduiPitara) kala sdang mynta bad kala ai jingmyntoi ia kumba 92000 ngut ki samla pule na ki 3925 tylli ki skul.
Ka Sorkar kala sdang pyntreikam ruh ia ka Meghalaya Vidya Samiksha Kendra, kaba dei ka Command & Control Centre ban buddien ia u soh ka pule dangle ne ka jingpass bha jong ki khynnah na ki skul.
“Kane kala pynlah ia ka Jylla ban buddien ia ka jingwan shim klas ki nonghikai, kaba kiew mynta n aka 30% sha kumba 80%. Kala nang pynjanai ruh ia ka mid-day meal reporting na ka 5% sha ka 95%” ula ong.
Nalor kane, u Lat ula pyntip ruh ba ka Captain Williamson Sangma State University ka dei kaba la dep ban plie dang shen, kaba pynlong ia ka kum ka University ba nyngkong eh ka Jylla bala ithuh da ka University Grants Commission (UGC).
Ka jingpyniasoh bad ka State University kan pynthikna ba ki samla pule kin ym donkam shuh ban hap iakhun ia ka Common University Entrance Test (CUET) ban leit pule Under Graduate bad Post-Graduate.
Ula pyntip ruh ba ka Sorkar kala pyntreikam bha ia kiba bun ki scholarship scheme jong ka Sorkar Pdeng bad Sorkar Jylla ban kyrshan ia ki samla pule naduh klas IX haduh kyrdan Ph.D ha baroh ki District ka Jylla.
Ha u snem bala lah, haduh 88539 ngut ki samla pule kila ioh jingmyntoi na kine ki scholarship, kaba kot lang baroh haduh T.104.50 klur.
