Shillong, Nailar 28 : U Symbud Myntri Rangbah ka Jylla Bah Prestone Tynsong ha ka sngi Balang, ula pyntip ba ka Sorkar Jylla ka dang bishar ia ka jingtyrwa ban pynkha ia ka District thymmai bad ia ka Mawsynram Civil Sub-Division ha East Khasi Hills District.
Haba jubab ia ka jingkylli ha Iingdorbar Thaw Ain, u Bah Prestone ula pyntip ba ka Sorkar ka dang bishar ruh ia ka jingtyrwa ban pynkha thymmai ia ki Community & Rural Development (C&RD) Block.
“Ka jingthmu ba hakhmat eh jong ka Sorkar (ban pynkha District thymmai, Civil Sub-Division bad C&RD Block) ka long ban wanrah shajan ia ka jingshakri ka Sorkar sha ki paidbah” ula bynrap.
Haba wanrah ia kane ka mat, u MLA ka TMC na Nongthymmai Bah Charles Pyngrope ula ban jur ia ka jingdonkam ia ka Sorkar ban pyrkhat noh ha kaban pynkha ia ka District thymmai haba khmih ia ka East Khasi Hills, kaba long kawei na ki District ba hehduh hapoh ka Jylla.
U MLA ka UDP na Mawsynram Bah Ollan Sing Suin ha kawei ka liang ula ong ba ka Mawsynram ka don hok ban ioh ia ka Civil Sub-Division namar ki nongshongshnong ki don kham bun ban ia ka Pynursla bad Ranikor bad ba bun ki shnong ki don sha ki jaka riat kiba jynjar ban poi.
“Kumta, tang ka Civil Sub-Divison kaba lah ban wanrah ia ka synshar khadar shajan jong u paidbah” ula ban jur.
Haba jubab ia kane, u Symbud Myntri Rangbah ula ban ba ka jingtyrwa ban kyntiew kyrdan ia ka Mawsynram sha ka Civil Sub-Division ka dei kaba dang shong bishar bnaih da ka Sorkar.
“Hadien bala dep shong bishar, ngan sa lah ban iathuh ia u dkhot ka Iingdorbar bad ki paidbah ka Mawsynram” ula ong.
