Shillong, Naitung 8 : U MDC ba mynta ka Mairang, Bah Batskhem Ryntathiang haduh mynta u dang don ha ka jingartatien la un ia khun ne em ia ka elekshon MLA ha u 2023 pyrshah ia u MLA ba mynta, ba dei ruh u Lamphang ka Iing Dorbar Thawain ka jylla, Bah Metbah Lyngdoh.
Haba ioh ban ia kren markhmat bad utei u MDC u la ong, “Haduh mynta ngam pat lah ban shim ia kano kano ka rai, lehse kan shim por sa katto katne bnai ba ngan lah ban pyntikna la ngan ia khun neem.
Tangba ha ka jingiakren pat la sngewthuh ba utei u MDC un mih beit ban aireng ha katei ka elekshon.
Da kaba kubur ba bun ki nongkyrshan ki kwah ia u ban mih ban aireng, utei u MDC um shym la treh pat ban jubab kano ka party kaba u kham noh ka mon lada jia ba u mih ban ia khun.
“La kumno kumno ha u bnai Risaw ne Naiwieng mynta u snem ngin sa shim ia ka rai kaba khatduh la ngin iaid shakhmat ne ngin sangeh noh,” u la ong.
Lah ban kdew hangne, shipor ki la phriang ki khubor ba utei u MDC u la thmu ban ia khun na ka NPP, hynrei na ka daw ka jingpan por jong u, katei ka jingiakren ruh ka la shu kut noh kumto.
