Shillong, Naitung 18 : Ki Myntri Sorkar ki dang ap ia u Myntri Rangbah ka Jylla Conrad K Sangma, ba un batai lem ia ki halor ka jingtyrwa ban leit sha Delhi ha kaban buddien bad ka Sorkar Pdeng ia ki artylli ki Resolution jong ka Iingdorbar Thaw Ain, ban pyntreikam ia ka Inner Line Permit (ILP) bad pynrung ia ka ktien Khasi bad Garo ha ka Khyrnit ba phra ka Riti Synshar ka Ri.
“Ngin ap ia u Myntri Rangbah ban batai ia ngi bad ngi kwah ruh ban iohi ba kine ki kam kin nym shu sahteng sah bad kumjuh ruh ba ki paidbah kin ym pyrkhat ba ngi la pynpjah ia kine ki kam” ong ka Myntri bad Nongaiktien ka Sorkar MDA Kong Ampareen Lyngdoh haba iakren bad ki nongthoh khubor.
Haba kylli, ka Kong Ampareen kala ong “Ka ILP ka dei ka kam kaba ngi la iakren n aka por sha ka por. Ka MRSSA ruh ka dei kaba ngi la mynjur. Lah dep ban pynkylla ruh ia ka bad la dep ban mynjur” haba bynrap “Ka ILP ka dei kaba kam kaba ka Sorkar India kan hap ban ai jingmynjur bad ka dei ma ka kaba don ka bor ban ai jingbit ban pyntreikam ia ka ILP hapoh ka Jylla Meghalaya”.
Ka Kong Ampareen kala ban jur ruh ba ki paidbah ki dei ban tip ia ka jingshisha ba ki don katto katne ki kam namar ka jingiaid ka synshar khadar hapoh ka Ri kaba ngi iadonlang, ngin hap ban iaid kat kum ki katto katne ki jingdonkam bad ki rukom treikam.
Halor ka ktien ka thylliej, ka Myntri kala ong ba la pyntip ba ki don katto katne ki jingdonkam kiba ka Sorkar kan hap ban leh bad mynta ka Sorkar ka dang leh ia kane.
Pule lang ia kane: Kyntu ka Myntri ia ki Sengbhalang ba pyrshah lynti rel ban leit wad bniah sha Mendipathar
