Shillong : Ka United Democratic Party ka la sei da u samla Dawan Lyngdoh ba dei ruh u MDC jong ka Mynsngat Khanduli ban iakhun pyrshah ia u MLA ba mynta ba dei ruh u Myntri ha ka sorkar Jylla Bah Sniawbhalang Dhar.
Ia ka kyrteng jong u ryngkat ka kyrteng u Ma Nujorki Sungoh MLA ka Mookaiaw bad ruh jong u Ma Moonlight Pariat kyrtong na Jowai, ki nongialam jong ka UDP West Jaiñtia Hills Distrik ki la leit ban aiti ha u General Secretary ka Party Dr. Jemino Lyngdoh ha iingsah jong ha kane ka janmiet.
Watla ka West Jaiñtia Hills ka don san tylli ki constituency hynrei na ka bynta ki artylli ki constituency ba dang sah, kata kynthup na Amlarem ba mihkhmat da u Bah Lahkmen Rymbui , kumjuh na Raliang ki nongialam ka party ki la rai ban sa pyndep noh ia ki kot ki sla bad phah noh ha kine ki khyndiat por ban wan.
Na ka liang u General Secretary ka UDP u la iathuh ruh ba na bynta ka Amlarem la don lypa u Bah Lahkmen Rymbui katba na Raliang pat ki don u briew uba biang.
Halor ki jingkylli, u Dr. Jemino u la ong, “Ngi la shaniah beit ha ki nongialam party ha kito ki jaka ban phah ia ki kyrteng jong ki kyrtong bad hangne ki phah tang kawei kawei ka kyrteng kaba la paw ba lada ym don ei ei shuh ki la dei ma ki ki kyrtong.”
Shuh shuh u la ong ruh ba ia ka ka kyrteng jong kine ki kyrtong baroh kin leit sha ka State Election Committee na ka bynta ban ioh ia ka jingmynjur.
